GIOVANNI MELI - Materiale Scienze della Formazione Primaria

Ripigghiava lu Fiscu: Li misuri,
E li pisi nun sù punti legali,
Servinu sulu pri li vinnituri;
Ccà si tratta di causa capitali,
Né ‘na rubrica di cui vinni e spenni
Putrà smuntari ‘na liggi sollenni;
E datu chi nun fussiru li sardi
Rei tunnicidi, è puntu stabilitu
Ch’unni mancia lu grossu nun azzardi
Nemmenu di liccari lu minutu...
Concedu, dici l'autru, chista è curpa;
Ma ccà si tratta d'ossu e non di purpa.
Si sbattiu di ccà e di ddà citannu testi
In gerghi girbunischi oltramarini,
E si citaru codici e diggesti,
Commentati da cernii e da 'mmistini;
Purtaru fatti, e tantu scarruzzaru
Chi lu puntu mattanti lu sbraccaru.
Sidevanu da judici li granci,
Lu prisidenti era un granciu fudduni;
Tutti a dui vucchi, acciocchì l'una manci,
L'autra addrizzi buggii, torcia raggiuni,
E cu ottu pedi a croccu, a dritta e a manca,
Trasevanu di chiattu e di fajanca.
Nun ànnu accessu a sti divinitati
Salvu chi li supremi sacerdoti,
Cioè li compatroni e l'avvocati;
Li curiali un pocu chiù rimoti
Curunanu li vittimi di ciuri,
Mentri vannu sucannucci l'umuri.
Tuttu lu restu è populu profanu,
Né tra stu santuariu metti pedi;
O si ci trasi, tra un locu stramanu
S'agnuna, e guarda la suprema sedi,
Chi di la vita disponi e di tanti
Aviri e facultà di tutti quanti.
Doppu chi sessionaru un lungu pezzu,
Da una parti e da l'autra l'avvocati,
E lu Fiscu a li straggi sempri avvezzu
Ni vulia 'mpisi e ni vulia squartati,
Li judici gridaru: Fora tutti!
E s'inchiusiru suli tra li grutti.
Chisti dunca spusannu a la prudenza
Li riguardi e li proprii fortuni
Consultanu lu codici, ma senza
Dari un'occhiata a lu senzu comuni,
Nun vulennu avvilirisi a pinsari,
Comu penzanu tutti li vulgari.