GIOVANNI MELI - Materiale Scienze della Formazione Primaria

LXVII
L'INSETTI MARITIMI DI LI SPONZI
Tra tanti e tanti sponzi chi sù in mari,
Da migghiara d'insetti populati,
Duvi ci ànnu li casi e li sulari,
Ciumi, ponti, curtigghi, chiazzi e strati,
Pri vidirni una, e staricci ‘na picca,
Lu spiritu di Esopu sicci ficca.
E in virtù di la sua potenza innata,
Vidi non vistu, e gira, e senza scala,
Scinni e acchiana ogni loggia; allurtimata
Penetra in una specii di sala,
Duv’eranu in consessu radunati
L'insetti li chiù saggi ed accimati.
Si ferma, ed eccu senti recitari
D'unu d'iddi un discursu, unni si prova
Chi l'universu cunsisteva in mari
Duvi la sponza, o munnu so si trova
(Sponza si chiama munnu tra sti banni,
Nun avennu autra idia di cosi granni).
Agghiunceva dicchiù: chi falsamenti
Avevanu l'antichi soi cridutu:
Ch’un munnu sulu ci fussi esistenti;
Mentr'iddu da ‘na specula vidutu
Ni avia, cu novi soi strumenti esatti,
Multi autri in gran distanza accussì fatti.
Benchì nun si distingui, poi soggiunci,
Si chisti tali fussiru abitati,
Lu miu strumentu a tali signu 'un junci;
Ma, si grata udienza mi accurdati,
M'ingignirò, signuri, di pruvarlu,
Ma nun mi fidu poi di a vui mustrarlu.
Pri criari stu munnu da lu nenti
Ci vòsi ‘na putenza auta, infinita;
E a un Essiri Infinitu, Onnipotenti,
Tant'è creari un munnu a darci vita,
Quant'è crearni centu miliuni:
Ddocu vi lasciu, e bonciornu, patruni.