GIOVANNI MELI - Materiale Scienze della Formazione Primaria

A un signu poi si ammira,
Ch’incontra trippiannu;
Cridi chi saria chistu
Per iddu un bonu acquistu.
Affabili ci accosta,
Dicennu: Tu sì in oziu;
T'àju circatu apposta
Pri dariti un nigoziu.
Si tu cu mia voi stari
C'è viviri e manciari.
Sarrà la tua incumbenza
Di appiccicari a un ulmu,
Duvi racina immenza
Pendi da lu so culmu;
Tu cogghi e jetti a mia,
Jeu poi ni dugnu a tia.
Cunsenti a un tali invitu
Lu signu, e di cuncertu
Si avvianu a lu situ,
Già consaputu e certu;
Arrivanu, e d'un sàutu
L'unu è a li cimi in àutu.
La viti era provista
Di frundi e frutti tantu
Chi ci spiriu di vista.
Lu signu trisca intantu
Chiusu tra l'abbundanza,
Manciannu a crepa-panza.
Di quann’in quannu alcuna
Rappa purrita o virdi
La jetta e l'abbanduna;
Lu cani grida: Oh spirdi!
Chi purcaria chi jetta!
E cu pacenzia aspetta.
Doppu chi saturatu
Si fu lu furbu, scinni,
Dicennu: Sù arrivatu
Pri fina tra l’intinni,
Ma fradici e corrutti
Truvai li rappi tutti.