GIOVANNI MELI - Materiale Scienze della Formazione Primaria

Si chiama lu cavaddu, e quannu zappa,
È un trasportu di focu juculanu,
Pari in vista chi l'aria s'appappa,
Ma lu so cori è comu carta bianca,
Nun ciunna, nun divora, e mancu attrappa;
'Nzumma cu chisti armali a manu franca
Trattaticci sicuri, e 'un dubitati:
L'autri nun vannu d'iddi un pilu d'anca.
Cussì dicia la matri, ed ammirati
Stavanu tutti a séntiri li figghi
Cu vucca aperta ed oricchi affilati.
Poi ripigghia lu primu: Meravigghi
Mamà, nni cunti; ma ti vogghiu diri
'Nzoccu poi vitti 'mmenzu a certi stigghi.
Un armaluzzu, chi facia piaciri
Sulu a guardarlu: era di pilu griciu,
E adaciu adaciu si videva jiri.
Li genti ci dicianu: miciu, miciu;
Ed iddu, cu mudestia ed occhi bassi,
'Ncugnava vasciu vasciu e sbriciu sbriciu,
E paria chi la testa si ficcassi
Sutta quasi li pedi di li genti,
E chi mancu la terra scarpisassi.
Avia ‘na vuci melenza, languenti,
Si turceva lu coddu, e si jittava
Facci pri terra a tutti li momenti.
Basta !... gridau la matri, chi trimava:
Mi arrizzanu li carni, e friddu friddu
Sentu un suduri chi tutta mi lava!
Ah! figghiu, figghiu, tu sì picciriddu!
Giudichi da l'esternu! Oh, si sapissi!...
Scànzanni, o Celu, da li granfi d'iddu!
E si avversu distinu a nui prescrissi…
(Ah! chi a sulu pinsarlu mi cunfunnu!)
Fa chi prima la terra nni agghiuttissi!