GIOVANNI MELI - Materiale Scienze della Formazione Primaria

Senza straggi muremu di dijunu.
Lu propriu individuu conservari
È prima liggi; né avemu autru mensu
Pri putiri la vita sustintari.
L'omu, chi sempri adùla e duna incensu
Sulu a se stissu, vistu chi nun spunta
Lu pretestu, chi l'autri 'un ànnu sensu.
N'à truvatu unu novu: osserva e cunta
Li denti di l'armali, si sù fatti
A pala, o puru a chiovu cu la punta:
Decidi chi li denti larghi e chiatti
Sù distinati a manciar’ervi e frutti,
E li puntuti sù a li carni adatti;
Dipoi conchiudi chi li specii tutti
Di denti immaginabili l'àv’iddu,
Perciò l'onnipossibili s'agghiutti.
Facennucci anchi bonu stu so griddu,
Pri cui si cridi in drittu di manciari
A crepapanza di chistu e di chiddu,
Nun pò l'abusu mai giustificari
Di li carni, giacchì 'ntra tanti denti
Quattru suli scagghiuni pò cuntari;
Quattru si ponnu diri o picca o nenti
tra trenta, o trentadui, chi n'àvi in vucca,
O chiatti o di figura differenti.
Cu quali drittu dunca scanna e ammucca
Quanti armali ci sù? Sta consequenza
Da li principii soi certu nun sbucca.
E si mai pò vantari ‘na dispenza
Di carni, in forza di li denti a punta,
La quantitati è parca e non immenza.
Chi quattru a trentadui giustu ci spunta,
Com'unu all'ottu, pirchì in trentadui
Ottu voti lu quattru si cci cunta;