GIOVANNI MELI - Materiale Scienze della Formazione Primaria

E senza offerti, o inviti,
Arriva e si l'appappa.
Nun pensa farci mali
La vicchiaredda pia,
E godi ca dd'armali
Si sazia e si arricria.
Vivennu quantu pò,
Lu porcu poi nun lassa
Fari da paru so:
Lu lemmu ci fracassa.
La vecchia a sta vinditta
Si pila e si contorci,
Dicennu mesta e afflitta:
Faciti beni a porci!
XXXVII
ANIMALI NOTTURNI E GIOVI
Lupi, vulpi ed autri bestii di rapina,
Uniti a li jacobi e a varvajanni,
Facianu istanza a Giovi ogni matina
Contra di Febbu, pirchì in terra spanni
Tanta luci, pri cui vennu obligati
Starisi in grutti e tani 'ncrafucchiati;
E chi l'està ci robba li megghiu uri
Di scurriri li campi, e di circari
Da cavaleri erranti l'avventuri:
Conchiudevanu in fini chi cui fari
Vòsi la luci putia farni a menu,
Bastannu di la notti lu serenu.
Giovi primu usau flemma, finalmenti
Stancu da tanti istanzi bestiali
Ci dici: Virgugnativi, insolenti,
Chi siti sutta assai di l'autri armali;
Pirchì la luci a vui nun torna a versu,
Ni vuliti privatu l'universu?
Comu si vidirianu senza luci
L'opiri mei magnifici ed esatti?
Cui li viventi avviva? cui produci,