GIOVANNI MELI - Materiale Scienze della Formazione Primaria

XVIII
LI CUCUCCIUTI
Si avia pisatu un'aria di frumentu,
Cu li voi cuncirtati a varii stracqui;
Ma nun si spagghiau beni, chi lu ventu
Spirau cutrariu, e poi vinniru l'acqui;
Perciò la pagghia ristau supra tutta,
Comu chiù leggia, e lu frumentu sutta.
Dui cucucciuti o tri di primu volu
Ci foru supra pri pizzuliari;
Ma trascurrennu lu supremu solu
Autru chi pagghia 'un pottiru truvari,
E ni ristaru cursi e nichiati
Malidicennu tutti ddi cuntrati.
Dicianu: Lochi fatti pri li staddi,
Nun siti digni d'essiri abitati
Chi da li suli scecchi e li cavaddi.
Ma l'autri oceddi chiù scaltri e addistrati
Di l'aria scavulìanu lu funnu
E trovanu frumentu grossu e biunnu.
Quannu in un statu ci sù fazioni,
E partiti e politicu scuncertu,
Li suggetti prudenti, saggi e boni
Si stannu sutta, misi a lu cuvertu,
E lassanu a li pagghi li chiù leggi
Godirisi l'onuri e privileggi.
XIX
LI SCECCHI ED ESOPU
Dui Scecchi cu li coddi 'ncrucicchiati
L'unu raspava all'autru. Nun ci leggi
Lu vulgu nenti chiù chi asinitati.
Li guarda Esopu, e grida: Oh testi leggi!
Gran lezioni è chista; profittati:
Lu bisognu reciprocu. Iddu reggi
Tutti li societati, e li bilancia,
L'unu raspannu all'autru unni ci mancia.