GIOVANNI MELI - Materiale Scienze della Formazione Primaria

Forsi, lu sceccu replica, li latri
Mi chiàntanu chiù grossu lu varduni?
Oh, no: E beni, me patruni,
Sautati vui, pri mia m’importa un ficu
Cu’ di li dui m’incoccia lu viddicu.
LU VOI E LA MUSCHITTA
Mentri un voi lavurava, ‘na muschitta
A pusari ci jiu supra un cornu;
Poi pretisi la sira essiri ascritta
Tra li lavuraturi di lu jornu
E dumannau la paga. Lu burgisi,
Di sta pretenzioni sinni risi.
Ma non ridinu in nui certi baruni,
Anzi paganu beni e profumati
Li tanti parassiti muscagghiuni
Chi si fannu vidiri affacinnati
E usurpanu lu lucru tuttu interu
Di chiddi chi fatiganu daveru.
L’ETIOPU E LA NIVI
Un Etiopu nigru comu pici
Pritindia farsi biancu strufinannu
La nivi tra la facci. Un saggiu dici:
È tempu persu, lèvati d’affannu,
Purrà tua facci la nivi anniriri
Ma non già chista tua facci imbianchiri.
LA MUSCA E LU LIUNI
‘na musca si pusau supra uun liuni,
E vidia chi l’armali tutti quanti
Scuprennu ad iddu stavanu a li ‘gnuni,
Né ardianu cumpariricci davanti;
Dunca, dissi, eu non sù di la comuni
Giacchì degna suffrirmi… L’ignoranti
Nun cumprindia chi pri dda testa altera
Tra l’essiri criati, idda nun c’era.