La capra barbana e altre fiabe popolari venete - Nicola Saba

«Marìo marion, meti su el caglieron, che go Piero Piereto in
sacheto.»
El caglieron jera ‘na gran pignata, granda. Eh -ciò- ‘a jera granda,
e a’ora ghe stava dentro Piereto; l’aqua jera de bojo, ‘a ciapa,
‘a slega el sacheto: -punfete!- ‘a buta dentro. Invese che Piereto,
ghe jera ‘na piera.
«Ah!» ‘a ga dito, «el me ‘a ga fata!»
E a’ora el giorno dopo ‘a torna ancora soto a l’albero dei peri; e
Piereto xe in alto.
‘A ghe dise: «Piero Piereto, butame basso un pereto, che son qua
che fì’o ‘a stopa, che me gustaré ‘a boca».
«Eh no bruta vecia striga, parché te me meti in sacheto.»
«No, Piereto, no.»
E insoma. Piereto se stanca e ghe buta el pereto.
E ‘a nona ghe dise: «Piero Piereto, vien a torme su el pereto, che
son qua che fì’o ‘a stopa che me gustaré la boca».
«No,» el ga dito, «parché te me meti in sacheto.»
«No!»
A’ora Piereto jera bon, ‘a nona ghe faseva pecà, el xe ‘ndà e ga
tolto su el pereto. E ea, ancora, svelta ‘o ciapa dentro el sacheto.
Ah, Piereto el jera disperà -ciò- parché, el ga dito, cossa me farà’a.
E camina, camina...
«Marìo marion, meti su el caglieron, che go Piero Piereto in
sacheto».
Ma ‘sta vecia ‘a jera anca stufa de caminar; ‘a mete zo el sacheto
parché, ‘a dise, me riposo un poco. Ma ghe serve de ‘ndare ancora
in gabineto. A’ora Piero Piereto dise: «oh, adesso bisogna che
scampa».
Scampa e ghe jera ‘na piegora, che ‘a jera morta, tuta bruta; ‘a
ciapa e ‘a mete dentro el sacheto, ‘o lega e scampa.
‘A nona ‘a vien: «So’ qua. Piereto, so’ qua».
Se ‘o mete in spa’a.