La capra barbana e altre fiabe popolari venete - Nicola Saba

Piero Piereto
veneto
Ghe gera ‘na volta un puteo che gh’aveva nome Piereto e
ghe piaseva tanto i peri; a’ora el gh’aveva un albero de peri e
‘ndava su par magnarli.
Ma soto a l’albero dei peri ghe gera ‘na nona, ma ‘na nona bruta
che i diseva che gera ‘na vecia striga.
E a’ora ghe dise: «Piero Piereto, butame basso un pereto, che son
qua che fi’o ‘a stopa, che me gustaré ‘a boca».
«Mi no bruta vecia striga, parché te me meti in sacheto.»
«No Piereto, no» ‘a ga dito, «butame zo ‘1 pereto.»
«Ben, ciapa nona.»
E dopo ‘a ghe dise: «Piero Piereto, vieme tor su ‘sto bel pereto,
che son qua che fì’o ‘a stopa, che me gustaré ‘a boca.»
«Mi no bruta vecia striga, parché te me meti in sacheto.»
E a’ora Piereto dise: «Va ben.»
El va e el ghe to’e su el pereto. Ma ‘a vecia col sacheto -prunfete!-
‘o tira dentro, ‘o mete sul saco, e ‘a ghe mete un spago e -via-, ‘a
se mete el sacheto su ‘e spa’e e ‘a parte.
E ‘a dise: «Marìo marion, meti su el caglieron, che go Piero Piereto
in sacheto.»
«Mama mia,» Piereto dise, «questa qua cosa me fa’a.»
Ma a un certo punto de ‘a strada, ‘a nona ghe serviva d’andare a
fare ‘a pipì; a’ora ‘a se ferma, ‘a mete zo el sacheto, ‘a va zo del
foso, su una riva.
E Piereto el se slega el sacheto, e -via- che scampa. El ciapa, e
mete dentro ‘na piera, un pieron, dentro sul sacheto, el sera cussì
e -via-!.
‘A nona, ‘a vecia, ‘a se ciapa el sacheto in spa’a, e ‘a va casa.