La capra barbana e altre fiabe popolari venete - Nicola Saba

«Bonasera bon omo, semo do poareti che domanda ‘a. carità e
domandemo un toco de pan e un poca de paja par poderse butar a
dormir».
«Ah» risponde el giardinier, «gnanca dirghe’o al me paron parché
queo el ve fa sbranar dai cani, el ve ‘iga e el ve fa passar ‘a vita ai
‘avori forsai.»
«Ma come, ‘a casa ‘a xe bea e rica e da magnar ghe ne sarà in
abondansa, dene calcossa.»
Ma chel stesso momento, vien fora el rustego del paron: «Corè via
disgrasiai!».
Piero e el Maestro disperai i torna su’a strada.
«Maestro oramai xe note fata, dove dormiremo?»
«Va pian Piero, va pian.»
Camina, camina e camina, ma proprio quando i stava per cro’ar
de fame e de sono, in ‘ontanansa i vede ‘na ‘uceta pico’a pico’a.
I se vissina e i vede un casoneto de campagna, pico’eto e miserabile.
«Ah mama mia, dove semo capitai Maestro, se no i ne ga da
ospitaità quei co ‘a casa rica, te pol imaginar questi qua che i xe
più poareti de noaltri.»
Drento ghe jera do veceti, marìo e muj’er, i jera drio a cusinar un
tocheto de pinsa soto ‘a senere. I gaveva so’o do careghe, ‘na to’a
e un ‘eto ma’andà.
«Andemo maestro che xe mejo.»
«Va pian Piero, va pian.»
A’ora Piero controvoja el bate a’a porta e vien fora i do veceti.
«Cossa vo’è?»
«Semo do poareti che ve domanda un toco de pan e un poca de
paja par poderse butar a dormir.»
«Vegnì avanti cari, vegnì avanti!»
‘A vecia ‘i fa entrar, e dopo ‘a va a tor ‘a pinsa da soto el camin,
‘a taja in do tochi el ghe ‘a da. Piero e el Maestro i magna in furia,