La capra barbana e altre fiabe popolari venete - Nicola Saba

‘A cavara Barbana
veneto
Ghe jera ‘na volta na nona, no ‘a gaveva gnente da magnare,
‘a se ga tolto un corte’eto, su ‘a casse’a de ‘a to’a, e ‘a xe ‘ndà a
radiceto.
Ma, quando che ‘a xe tornada ‘a ga visto che ‘a se gaveva
desmentegà ‘a porta verta.
«Ah mama mia! Me go desmentegà ‘a porta verta.»
‘A xe ‘ndada dentro e ‘a sente:
«Mi son ‘a cavara barbana coi denti ‘onghi ‘na spana che tuti quei
che cato gargato».
Ah- disperada sta nona, disperada, ‘a pianse, ‘a pianse, ‘a pianse;
passa de ‘a un gateo; el ghe dise:
«Cossa te ga nona, che te piansi?».
«Tasi tasi caro, so ‘ndà a radiceto e me go desmentegà ‘a porta
verta, e go ‘a cavara barbana su par el camin.»
«Cossa te me dà che te ‘a paro via?»
«Queo che te voi.»
«Un quartier de farina.»
A’ora sta nona ‘a va par ‘e case, ‘a core in giro fin che ‘a trova tuta
‘a farina, ‘a ghe porta ‘a farina, el gateo magna tuto, parché el se
ga fato come ‘na po’entina e po’ el scampa, el va via.
Povera nona ‘a ‘assa so’a; ‘a nona pianse, pianse e pianse.
-Bu! Bu! Bu!- passa el cagneto, el ghe dise:
«Ciao nona, cossa te ga che te piansi?».
«Tasi tasi caro, go ‘a cavara barbana su par el camin.»
«Cossa te me da se te ‘a paro via?»
«Queo che te voi.»
«Un quartier de nose.»