La capra barbana e altre fiabe popolari venete - Nicola Saba

El re abrassa Nane, e strensendo’o a iu el se acorze de ‘na curiosa
cicatrice che el ga su’e spa’e, maravejà el ghe domanda:
«Giovane chi ti xe? da dove ti vien? contime ‘a to storia».
Nane ghe conta de iu, de so pare e de so mare, e de come che ‘1
xe sta trovà e cresuo come un fio.
El re piansendo: «Ti a’ora ti xe me fio» el ghe dise abrassando’o
danovo, «ti xe sta rapìo quando che ti jeri ancora un puteo picenin,
da zente cativa che vo’eva coparte parché no ti ciapassi el me
posto sul trono, ma ‘a persona che doveva coparte no ga vuo el
coragio e cussì el te ga messo in ‘na sesta sul fiume, sta cicatrice
che ti ga su’a spa’a ‘a xe un segno inconfondibi’e dea to identità
anca dopo tanti ani».
El re a’ora dà ordine de preparar sete giorni de festa in onor de so
fio ritrovà. Nane passa dei bei giorni fe’isi, ma de colpo el se
ratrista.
«Cossa ti ga fio mio?» ghe domanda el re. «Pare, qua stago ben,
ma me manca i me genitori adotivi che me ga vossuo tanto ben.»
El re capisse, el fa ciamar a corte el pescaor, so mujer, i so dodese
fioi e insieme, nel casteo, i ga vissuo par sento ani feisi e contenti.