La capra barbana e altre fiabe popolari venete - Nicola Saba

entrà nel covo segreto el se acorze ch’el capo dei briganti jera za
scampà, co ‘na corda el se gaveva butà alde’à del buron.
Nane, el se varda intorno e el sente ancora ‘a vose: «Aiuto, aiuto,
libereme...!».
La jera la principessa che, incaenada, pianseva disperada. Nane
‘a ‘ibera, e ‘a principessa ‘a ghe buta i brassi al co’o, «Grasie ti
me ga salvà, me papà te ricompensarà».
Ma adesso i doveva traversar el buron. Nane, oltre che forte el
jera anca inte’igente, el ‘iga un scabe’o a’a fine de ‘na corda,
fasendo ‘na specie de brisco’o.
«Par primo ti passi ti Spacamo’e, dopo noialtri te mandemo ‘a
principessa, dopo vien Spacasassi e dopo mi».
E cussì i ga fato. Quando Spacasassi el xe passa alde’à invesse de
mandarghe el sgabeo, el taja la corda e siga:
«Ciao Nane e grasie, ora noialtri andemo a torse ‘a ricompensa
dal re e ti resti ‘à».
«Disgrasiai, ‘azaroni, mi ve go jutà e voialtri me ricambié cussì!»
Ma Nane, no se da par vinto, el tol i nisio’i dai ‘eti dei briganti, li
‘iga, el fa ‘na corda, el salta el buron e ‘1 core forte verso ‘a regia.
Dove però staltri do compari co ‘a principessa i jera za rivai.
El re se gaveva za incontrà co so fia, basada e strucada, e ‘1 gaveva
fato portar un forsier pien de oro e zafìri par i so salvadori.
«No i xe ‘ori papà che i me ga liberà, ma un toso beo e forte.»
«Fia mia, ‘ori te ga riportà a casa e a ‘ori ghe dago ‘a ricompensa!»
I do i ‘o ringrasia, e i scampa via col forsier. Poco dopo Nane el
riva al casteo sensa fià e tuto sporco; ‘e guardie ‘e xe drio a mandarlo
via come el fusse un strasson, ma ‘a principessa par fortuna
‘o vede e ‘a siga:
«Fermi, el me ga salva iu dai briganti».
E rivolta al re so pare:
«El xe iu papà, el toso che me ga liberà, ti ga da premiarlo».