La capra barbana e altre fiabe popolari venete - Nicola Saba

A sie ani quando che ‘1 xe ‘ndà a scuo’a, el jera grande come un
omo, ma tanto bon de cuor. Un giorno, ‘ndando a scuo’a un fio
par dispeto el ghe buta la carte’a in fosso a uno dei so fradei. Nane
el xe subito corso, el ghe ga da un s-ciafo, nol ghe ‘o ga da par
cativeria ma par farghe capir che no se doveva far i dispeti. Ma ‘a
jera tanta ‘a so forsa che col s-ciafo el ‘o ga copà.
«Scampa Nane» ghe siga so fradeo «va a casa da’a mama prima
che riva ‘e guardie a ciaparte.»
Nane corre a casa da’a mama, el ghe conta que’o che ghe xe capità
par fio e par segno. A’ora ‘a mama ‘a ghe mete dentro a un fasso’eto
un toco de pan, un pomo e un poca de carne seca e ‘a ghe dise:
«Scampa fio mio prima che riva ‘e guardie a ciaparte».
In que’o i sente bater a’a porta, e jera ‘e guardie. Nane, salta dal
balcon, el scampa via de corsa che nissun pol più ciaparlo e cussì
el se da a’a ventura.
Camina, camina e camina el passa davanti a un mu’in, sora ghe xe
un toso tuto indafarà.
«Cossa ti fa ‘a sora?» ghe domanda Nane.
«Eh, xe ani che serco de giustar sto mu’in, ma no so mai sta bon,
più che giusto ‘e moe, più ‘e se spaca.»
«’Assa tuto Spacamo’e e vien co mi.»
El toso vien zo e ‘1 se mete in strada co Nane. Prima de sera i riva
in co’ina e i vede un giovane che remena dei gran massi.
«Cossa ti fa ‘a in alto?» ghe domanda Nane.
«Eh, xe ani che serco de ‘iberar ‘a tera da sti massi, ma più che
ghe ne sposto e più ghe ne vien su.»
«’Assa tuto Spacasassi e vien co ‘nialtri.»
El toso el vien zo, el se mete in strada co Nane e Spacamo’e.
Camina, camina e camina i tre i riva sui monti che jera za sera. I
vede ‘na caverna e i va a ripararse dentro. Nane se senta, el verse
el so fasoeto e ‘1 scominsia a magnar el toco de pan; Spacasassi e
Spacamo’e ‘o varda co do oci da morti de fame.