La capra barbana e altre fiabe popolari venete - Nicola Saba

El mondo vol cascar
veneto
Tanto tempo fa compare Ga’o, mentre el dormiva soto ‘n
albero, el ga sentìo un forte colpo in testa. Svejandose de colpo el
ga pensà: «Qua el mondo vol cascar» e cussì el ga deciso de meterse
in viajo. A’a comare Ga’ina che ghe domandava dove che ‘ndava,
el ghe ga dito:
«Vago a Roma perché el mondo vol cascar».
«Vegno anca mi» ghe ga dito ‘a Ga’ina.
«Vegnì, vegnì comare, cussì se faremo compagnia.»
Camina, camina e camina i ga incontrà l’Arana Contessa che ghe
domanda a ‘ori: «Dove ‘ndè compari?» «Andemo a Roma perché
el mondo vol cascare, vo’a venir anca ea?»
«Certo» ghe risponde l’Arana Contessa, e insieme i se incamina e
più vanti i trova l’Oca Badessa che ghe domanda a ‘ori:
«Dove andè de beo compari?».
«Andemo a Roma parché el mondo vol cascare, vo’a venir anca
ea?»
«Certamente», ghe risponde l’Oca Badessa, e tuti insieme i se ga
messo a caminar. Fata tanta strada, i ga incontrà el porseo e ‘a
porsea e i ghe domanda:
«Dove andè de beo compari?».
«Andemo a Roma, parché el mondo vol cascare» ghe ga risposto
‘1 Ga’o, ‘a Ga’ina, l’Arana Contessa e l’Oca Badessa.
«Vó’è venir anca voaltri?»
«Certamente» i ghe ga risposto i porsei, e insieme i se ga messo a
caminare. Fata tanta strada, i riva de note e i se ga messo a dormir
a’a bona, dove xe capità.