La capra barbana e altre fiabe popolari venete - Nicola Saba

I ‘adri de fighi
veneto
Ghe jera ‘na volta do fradei che i se gaveva messo d’acordo
par andar a robar i fìghi. ‘Na sera i va in ‘na casa dove che ghe
jera un bel’albero de fighi e pian pian i impinisse ‘a borsa.
I vien zo dal’albero e sensa che nissun i veda i xe tornai a casa.
‘A matina dopo el paron el se acorse che manca i fìghi e ‘1 decide
de far ‘a guardia a l’albero quando sarà sera. I do fradei i torna
ancora sul posto. A sera i scominsia a stacar i fighi dal’albero.
El paron, che stava de guardia, quando i vede el pensa ben de
metarghe paura. El se mete un nisio’o in testa e ‘1 gira torno a
l’albero disendo:
«’Na volta che jerimo vivi dormivimo par sti cortivi, ora che semo
morti giremo par sti orti, pian pian ‘ndaremo a basarghe ‘a man».
Un fradeo dise:
«No te ga sentìo gnente ti?».
«No» risponde staltro.
«Epur a mi me par de sì.»
A’ora i se ferma par scoltar. El paron girando ancora torno a l’albero
el dise:
«’Na volta che jerimo vivi dormivimo par sti cortivi, ora che semo
morti giremo par sti orti, pian pian ‘ndaremo a basarghe ‘a man».
I fradei a’ora i se acorze del fantasma e i ciapa ‘na gran paura,
tanto che i xe cascai zo de colpo dae rame schissando cussì tuti i
fighi.
Po’ i se ga messo a corer cussì forte, che mi che jero ‘à no i go
visti gnanca passar.