La capra barbana e altre fiabe popolari venete - Nicola Saba

«Co mi» risponde calma ‘a rana.
«Senti cossa che ‘a dise, co ‘na rana!»
«Serto, proprio co mi, no preocuparte, va vanti che mi te vegno
drio.»
Cussì i va. Par strada i trova so fradei che i canta, i sona insieme
ae so mujer.
«’A tua Toni dove te ‘a ga sconta?»
I ghe dise to’endo’o in giro. Toni jera drio par pianser, ma
improvisamente ‘a raneta ‘a se trasforma, come par magia, in ‘na
bea principessa.
Dopo ‘a monta co Toni sora ‘na carossa tuta d’oro tirada da sete
cavai bianchi aparsa in quel momento. Staltri quatro i varda
maravejai pieni de invidia.
A casa so mama se complimenta co Toni parché el ga trovà no
so’o ‘a più brava ma anca ‘a più bea sposa. Intanto staltre do gnore
‘e more de rabia vardando ‘a principessa e ‘e voria robarghe el
segreto dea so be’essa.
‘A matina dopo ‘a principessa va in orto e ‘a se ‘ava el viso co ‘a
calsina viva. ‘E do cugnae, sconte, ‘a varda meravegiae. Ea intanto,
‘a se suga, e ‘a diventa ancora più bea de prima. ‘E cugnae,
anca ‘ore, e se ‘ava co’a calsina e cussì ‘e se rovina el viso e ‘e
deventa più brute de prima.