La capra barbana e altre fiabe popolari venete - Nicola Saba

Toni riva al sotto ponteseo, el se senta sul mureto e pianse. Salta
fora ‘a rana e ‘a ghe domanda:
«Cossa te ga che te piansi?»
«’A mama ne ga dà un nisio’o par omo da darghe ae morose da
ricamar, cussì ‘a più brava deventarà ‘a mejo gnora. Mi so disperà
parche no so a chi darghe’o.»
«No preocuparte Toni» ‘o consola ‘a raneta, «dame’o che ghe penso
mi.»
«Come te fa se te si ‘na rana?» dise Toni.
«Ti bute’o e no pensarghe.»
Iu el ghe ‘o buta, ea ‘o ciapa e va via.
Dopo un fià de zorni ‘a mama manda i fìoi a tor i nisioi ricamai.
Al soito ponteseo e al soito mureto Toni el se senta e pianse.
Ma eco che dal fosso vien fora ‘a raneta co ‘na bea scato’a tra ‘e
satine. Toni ‘a verse e vede el nisio’o ricamà, stirà e ben piegà,
ringrassia e ‘l va via.
Par strada el trova so fradei, che rozi contadini che i jera, i tegneva
i nisioi strapassai soto el brasso.
«Dove xe el to nisio’o Toni che no ‘o vedemo?»
Iu vergognandose un fìà el ghe risponde:
«Cossa vo’è, el xe tanto picenin che ‘o tegno soto ‘a giaca, el xe
ben piegà ma no ve’o fasso vedar».
Arivai a casa ‘a mama ‘i varda ben tuti, el primo ‘o scarta parché
el gaveva ‘na macia de sangue de ‘a ricamatrice che se gaveva
sbusà co l’ago, el secondo ‘o scarta parché el jera mal rifìnio, el
terso invese, queo de Toni, ‘o tien parché el jera ben ricamà, stirà
e piegà, ‘a ghe dise a so fìo:
«’A tua sarà ‘a mejo gnora».
Toni xe contento, i so fradei invesse i mor de rabia. Quando xe el
momento de sposarse ogniun va da so morosa, ma Toni va al soito
ponteseo a pianser sul mureto, vien fora subito ‘a raneta e Toni
ghe dise: «A’ora mi con chi me sposo?».