La capra barbana e altre fiabe popolari venete - Nicola Saba

‘A storia dea raneta
veneto
Ghe jera ‘na volta ‘na mama che un zorno ciama so fìoi che
i era ancora da maridar, ‘a ghe dise:
«Fioi mii, mi so drio par deventar vecia e vorìa che voaltri ve
trovassi ‘na morosa».
I fìoi ubidienti i va in serca de ‘na tosa. I primi do ‘a trova subito,
ma el terso, Toni, timido e scontroso, resta so’o. Sentà su ‘na mureta
de un ponte el pianse.
«Cossa te ga Toni che te piansi?» ghe dise ‘na vose che vien dal
fosso.
El zovane se gira, ma nol vede nissun. Dopo un fìà el se sente far
‘a stessa domanda. El varda mejo, el se acorse che a parlar jera
‘na raneta, e piansendo el ghe risponde:
«I me fradei i se ga trova ‘a morosa, e mi no. No so cossa contarghe
a me mama che ga deciso de maridarme».
«No preocuparte, ghe dise ‘a raneta, dighe che sarò mi ‘a to morosa.»
«No xe posibie, ti xe ‘na rana!» dise Toni, ma ea ripete:
«Fa queo che te digo e te vedarè che ‘ndarà tuto ben».
Toni ubidisse, va a casa. Par strada trova so fradei, che contenti
beati i ghe dise:
«Noaltri ‘a morosa ‘a gavemo trovada, e ti?»
«Anca mi» dise Toni imbarassà, sensa contarghe gnente altro.
A casa so mama i ciama visin a ea:
«Fioi mii adesso che gavè trovà ‘a morosa ciapè sti nisioi, deghei
ae future mujer, quea che savarà ricamar mejo, deventarà ‘a gnora
preferia ».
I fradei ubbidisse, co i nisioi soto el brasso i va dae so morose.