Piccola Venezia - Ecomuseo e Agenda 21 Parabiago

Augusto Boldorini – Piccola Venezia - 58
La Paduana la valsa ‘l crusoon,
da parti doo donn a tignighi ‘l curdoon.
Ciarlina, sta atenta, tegn driss la candira,
se no ta ma smagia al scusa cunt la scira.
O bruta ciola vardee sa la diis,
ta ghe propri la lengua cumpagn da la bissa;
la me candira l’è no nanca pissa.
Sa l’è no parchè sem a la funsioon,
cunt una soquara ta rumpevi al musoon.
E po’ splendenti cume una visioon
ga riva i fioo da la Prima Cumanioon.
Un gili in maan apena cataa
e in un minut in tutt vernisaa.
Vistii da San Carlu ga riva i scular,
portan cilostar e cilustrum
e i guida al Cafaruu.
Menan a spass al balduchiin
e sota ga sta, cun in spala al pivial,
ca podi sbagliam ma al pesa un quintal,
al poor Curadu, e ga la fa puu
a purta in gir al nos Gesu.
Dopu ga vegn tuta la tropa
oman e donn a la rinfusa;
‘l Brusiin al tenta da fai tasee,
e se un quei vuu propi al tas no,
lu al fa da tutt par fas varee
e al dis “Val disi mi”.
Sul che inveci da parlaa a la maan,
lu ga la dis in italian,
quasi par das pusèe impurtanza
ma anca lu l’è da Villastanza.
Al poor Pipinò al dis al rusari,
stracc me un vilaan al ga da dree,
Ave Maria, grazia plena…s’ tui Iesus;
Amen… va la ca l’è istess.