Piccola Venezia - Ecomuseo e Agenda 21 Parabiago

Augusto Boldorini – Piccola Venezia - 50
La mée Stràa
Quattar evan i stràa dal mèe paes ;
tutt cumincevan in piassa e finivan in di scès.
La Magina, al Palassi, la Pisina e la mia,
senza nôm …. a l’andeva a Villapia.
Pochi pretes la gheva la mèe stràa;
grôndi in malura, mur scalcinàa,
càa vegi e cunt giò la rissaa;
ma son nassù mi e la và ricurdàa.
In facia a la gésa e visin a la pésa
gheva la Girota: una butega cunt den tuscoss,
tutt al paes al feva la spesa
cume al fudess al Gisse da adess.
Fruta, saracchi, mudanti e naftalina,
cartej, peniti, olii, asée e cunegrina;
o certu ta trueva no ‘l Camay o quel
a la vaniglia, vun sul l’eva al savùn,
quel da Marsiglia.
Da l’ôltra parti la càa dal Farée,
e apena dopu ga steva al bichè,
in sul mur i quarti da bôo,
e un pass innansi a gheva ‘l barbè.
In facia….. quasi scunduu,
ta trueva un bel puss cunt l’acqua fresca,
fursi par caso o cunt’ intenzioon
a tan piazza lì al Circuloon.
La sucietà da la Tassa, ta sa ricorda?
al lunedì l’eva al so dii;
adess par drugass a ciapan la coca
alur quas tuti a ciapevan la cioca.