Piccola Venezia - Ecomuseo e Agenda 21 Parabiago

Augusto Boldorini – Piccola Venezia - 36
I Giustar
Par al dìi da la festa
ga riveva i giustar.
Quela a cavall par i fiuriti
quela a caden o “calci in cù”
al par de sguràa
quand ta ve sù.
La pusé bèla l’eva quela a barcheti,
solitament s’andeva suu in duu,
l’eva fàa a posta par i cuppieti,
la puncia lee, al calca luu
e intant la barca a la vaa suu.
I sochi sgoran, sa vedi i mudanti,
a crepaa dal ridi sota in tanti.
“Fermas, fermas calca puu!”
“Parchée? Propi adess ca vem suu”
“Fermas o dìi, ta vedi no
ch’in lì tuti a guardam al cuu?”
“Lassa ca guardan, duu culpi anmoo
e poo vemm giò.”
Mezanoci da un po’ l’è pasàa,
“Vento, vento portami via con te”
l’è la canzuun ca sa senti sunàa,
e chi duu lì l’ann ciapàa in parola
e s’en fàa purtà fina al praa dal Bagiola.
Credan anmò da ves in barchetta,
ma al post de la barca adess ghe l’erbetta,
cunt tuti i sforzi c’al prova fàa lù
ghe nien da fàa, sa va suu pù.
A.B.