Piccola Venezia - Ecomuseo e Agenda 21 Parabiago

Augusto Boldorini – Piccola Venezia - 32
Sciòo-sciòo … Ciàa-ciàa
Sciòo-sciòo, ciàa-ciàa;
l’è no un parlà cines
o una rumba brasiliana,
in dô da chi parol
ca sa usava chi in campagna.
I giuin d’incô ‘l sann nò,
ma i vegi cumè mi
ai besti parlevum inscì;
…e sa fasevum capìi.
Ciàa-ciàa par tirà pròo i gain;
ani-ani-ani e ga riveva i anid;
par dumandà i ochi: rô-rô-rooo;
e pô par fai scapà: sciòo-sciòo.
Pì-pì-pì sa diseva ai purasiti;
pol-po-pol e la pola la vigneva,
ma pô se ün al fischieva
l’eva ‘l puloon ca’l rispundeva.
Ghicia par fa scappa la gata,
t’c-t’c-t’c par fala vigni chi;
e ‘l caan par dumandal;
l’eva see a fa pfs – pfs – pfs.
Uuuh – uuuh par far partì ‘l caval.
lôoh – lôoh! sa vuseva par fermal ;
tèe pina, tèe la sàa
e la cavara la sa laseva ciapàa.
Sembran cose da ridere;
e pur a l’eva inscì,
senza andaa ne nuu
ne luur a scora,
riuscivum a fas capii.
A.B.