I MALAVOGLIA - Kesiev

‘Ntoni Intantu Campana e lignu fa cambiara nu cannala o fa mintira ‘na manipulata
e cacina a ru muru du cortila e tuttu ppé aumentara u prezzu.
SCENA IX
(Padron ‘Ntoni, Zio Crocifisso, Pedepapera)
Padron ‘Ntoni Zu Crocifì, si riuscimu a mintira e banda i sordi chi servanu ppé a casa,
vui mi l’aviti vindira a mia, pecchì a casa du Nespulu è sempra stata dei
Malavoglia ed eu desideru morira duva sugnu natu.
Zio Crocifisso Certu!... Certu!....Padron ‘Ntoni, com’è ca nun maritati chiù a neputa vostra?
Padron ‘Ntoni Si marita quandu vò Diu! Eu ppé mia a spuserra puru domana!
Zio Crocifisso Fussa a ru postu vostru eu ci a dunerra ad Alfio Mosca. E’ nu guagliuna
bravu e faticatura; sacciu ppé sentutu dira ca cerca na fimmina e spusara e
cca e de dda, nun ha atri difetti. Aiu puru sentutu dira ca sta ppé turnara; a
mia sembra fattu apposta ppé Mena vostra.
Padron ‘Ntoni Ma nun si dicia ca stavia e pigghiara a neputa vostra?
Zio Crocifisso Puru vui?...Puru vui mò criditi a tuttu chiddu chi dicianu i genti?
Su tutti chiacchiari! A verità è che Alfieddu vo pappara a ra neputa mia
a Chiusa, eccu chi vò da neputa mia! Bella cosa, eh?
Vui chi dicerravu si eu vinderra a casa vostra a ‘ncunu atru? Eh, chi
dicerravu?
Pedepapera A Vespa mò ci ha ppé i mani Brasi Cipolla; l’aiu vistu eu cu l’occhi mei
chi jianu versu u turrenteddu. Eu c’eru iutu ppé cercara du’ petriceddi lisci
ppé l’intonacu dell’abbiviratura. Idda facia a smorfiusa, a civetta.
Cu i cocchi du maccatura subra a vucca ci dicia: “Nun è veru nenta, vu pozzu
giurara subra sta medagghia beneditta chi c’aiu cca, ca un è veru nenta.
Mi faciti venira u voltastomacu, quandu mi parrati e chiddu vecchiu barbogiu
e ziumma.
Zu Crocifì, parrava e vui e si dassava toccara a medagghia, u sapiti duva a
tena? E Brasi dicia: “Allora chi facimu?” “Eu chiddu chi voliti fara vui, nun
pozzo sapira, ma si è veru ca mi voliti bena. comu diciti, nun mi potiti
dassara a stu statu! Eu nun fazzu ca pensara a vui e quandu nun vi viu, mi
sentu u cora comu si fussa spaccatu ‘ndui, comu du spicchi e portugallu e si
vi fannu ‘nzurara cu ‘ncuna atra, vi giuru subra sta medagghia beneditta, chi
tegnu cca, sentiti?, ca a stu paisa succederà qualcosa di grossu, pecchì eu mi
buttu a mara bella e vestita comu sugnu.”
Brasi si grattava a capu e rispondiu:”Eu ppé mia vi vogghiu, ma patramma
dicia ca no!” E a Vespa: ”Sapiti chi facimu? Na fujimu e quandu ha frittata
è fatta, ha de dira sì ppé forza!”
Già, Padron Cipolla nun ha atri figghi e a roba nun sa a china ma dassa.
Zio Crocifisso Chidda strega ha u diavulu chi a pizzica sutta a gunnedda! E pensara
ca tena a medagghia da Madonna subra u pettu! Però ci l’avimu e dira a
Padron Cipolla; simu sì o no di galantomini? Ah! Si padron Fortunatu nun
sta bene ‘nguardia, a strega e neputamma si joca u figghiu.
Pedepapera Però nun ci u dicitira ca vi l’aiu dittu eu, mi raccomandu; nun mi vogghiu
mintira a ra vucca e chidda vipera da neputa vostra.
SCENA X
(Don Franco, Don Giammaria, Moglie Don Franco, Don Silvestro)
52