I MALAVOGLIA - Kesiev

L’aiu sentutu eu cu st’oricchi Marianu Cinghialenta e Roccu Spatu chi u
dicianu. E puru Vanni Pizzutu, nonostanta camina scazu, eu u canuscivi.
Sulu iddu trascina i pedi e fa tanta purvarata chi mancu ‘na mandra e pecuri.
Santuzza A vui chi vi ‘nde ‘mporta? Ricordativi ca l’osteria è comu nu portu e mara:
genti chi vannu, genti chi venanu e, comu dicia u proverbiu, nui avimu essara
“amici cu tutti e fedeli cu nessunu!” E poi, sia Marianu Cinghialenta ca
Roccu Spatu spendanu a ra putica nostra e chissu è pana ppé nui!
Don Franco Eu dicu ch’è ura ma a facimu finita. Avimu jettara tuttu a gambi all’aria e
cambiara u sindacu e i consiglieri.
Don Silvestro Sugnu d’accordu cu vui! Avimu propriu e cambiara registru, vistu ca mastru
Croce Callà, comu v’aiu già dittu, s’è fattu mintira a gunnedda da figghia chi
fa u sindacu a ru postu soi; vistu ca a massaru Filippo nun ci’nde frica mancu
nu cavulu iurutu du Comuna; mentra padron Cipolla giura ca iddu u sindacu
nun u fa macu si l’ammazzanu. Tutti ‘na massa e minchioni! Oia dicianu
iancu.domana dicianu niguru e l’urtimu chi parra ha ragiuna. E’ veru, stu
governu ci suca u sangu comu ‘na mignatta; ma purtroppu i sordi volenta o
nolenta hannu e venira fora. Concludendu, cca ci volerra nu sindacu cu tantu
cerveddu e liberala comu a vui.
Don Franco Si eu fussa u sindacu e stu paisa, ppé prima cosa l’attuala consigghiu va tuttu
a casa, va rinnovatu da capu a ri pedi.
Don Silvestro Chi ‘nde diciti e padron Ntoni?
Don Franco Ppé l’ amuri e Diu, mancu a pensarci! Aviti già dimeticatu ca cu l’affara di
luppini ha dassatu a nora sulu cu a suttana? Se l’interessi du Comuna i fa
a sta manera……No, no, mancu a pensarci! (vedendo la moglie) Don Silvé,
bellissima giornata, eh?
Don Silvestro Sì, bellissima! I miei omaggi! (uscendo dalla scena) Fidati e unu chi si
spagna da mugghiera!
SCENA XVI
(Mena, Alfio, Zoppidda)
Mena A vui nun vi ‘nde importa si mintanu a tassa subra i ciucci?
Alfio Sì, ca mi ‘nde importa! Ma viditi, si nun faticu nun a pozzu mancu pagara
e accussì mi pianu u ciucciu e puru u carru.
Mena U nunnu ci ha raccomandati ma tenimu a porta chiusa…..
Partiti puru domana?
Alfio Sì, aiu e pigghiara nu carricu e cacia ppé mastru Callà.
Mena Nun ce jitira è troppu periculusu. E’ propriu u sindacu chi vonnu ammazzara.
Vanni Pizzutu ha chiusu u salona e si ‘nde va in giru cu u resulu intra a
sacca. Chiddi ammazzanu puru vui, nun ce jitira
Alfio U sindacu ha dittu ca nun ci ‘nde ‘mporta nenta! Dicia ca iddu è nu muratora,
perciò domana va a fara nu zirambicu a ra vigna e massaru Filippu.
Ha dittu puru ca si i genti nun vonnu u daziu subra a picia, Don Silvestru
studierà ‘ncun’ atra cosa: u segretariu sa chiddu chi fa!
Zoppidda Nun vi l’aiu dittu sempra eu e chi n’è a curpa? Don Silvestru nun c’ ha nenta
da perdera; tantu iddu nun ha mai avutu nu pezzu e tavula a mara, quindi u
daziu subra a picia u paganu l’atri e nun iddu; perciò a iddu a cosa nun u
riguarda minimamenta.
28