I MALAVOGLIA - Kesiev

Mena Grazzi!
SCENA XV
(Don Silvestro, Zoppidda, Padron Cipolla, Zoppiddu, Pedepapera, Donna Rosolina, Santuzza, Grazia, Mangiacarrubbe,
Zio Crocifisso, Moglie Don Franco)
Don Silvestro A sapiti l’urtima? Chissa ma l’ha cuntata l’avvocatu meu; unu si lamentava
pecchì avia e pagara a tassa e successiona; allora l’avvocatu chi è figghiu
e ‘na crocchia, ci dissa: Nun va ciangitira, anzi vistu ch’aviti e dara ‘na parta
d’eredità a Sua Maestà u Re, vantativi dicendu ca vui e Vittorio Emanuele
siti parenti stritti.
Zoppidda Chiddi chi mintanu i tassi l’averranu e vrusciara vivi! U sacciu eu chiddu chi
vonnu certi mangiacarti, chi nun hanno mancu i cazetti intra i stivali
verniciati. Chiddu chi vonnu è ficcarsi intra i casi di genti per bene e
papparsi a dota e a figghia. “Bella mia, non voglio te, voglio i tuoi soldi!”
Dicia ‘na canzuna, ppé chissu aiu dassatu a ra casa Barbara, a mia certi
facci nun mi piacciunu.
Padron Cipolla U diciti a mia? A mia, si i dassu fara certi genti mi scorticannu vivu, come
san Bartolomeu.
Zoppiddu Va a finira brutta, troppu brutta cu sti italiani!
Zoppidda Vui nun sapiti propriu nenta, perciò è megghiu ma vi staviti quetu; cusitivi
a vucca!
Zoppiddu Eu dicu solamenta chiddu chi hai dittu tu, cara mugghiera mia; ca ci levanu
puru a cammisa e ‘ncoddu, ci levanu!
Pedepapera Pecchì nun faciti spusara Brasi ccu a cummara Barbara? Accussì mamma e
figghia sunnu cuntenti e nun dannu l’anima a ru diavulu.
Donna Rosolina E’ ‘na vera porcheria! Tutta curpa e Garibaldi! Si mintanu sempra cchiù tassi
e nessunu cchiù si ‘nzura. A sti condizioni nun si po’ certu mantenira ‘na
famigghia.
Pedepapera Ma a donna Rosolina chi ci ‘nde po’ fricara ormai?
Donna Rosolina (a don Silvestro) Sapissivu aiu tantu da fara, chi mancu immaginati; decia
canni d’orditu subra u tilaru, i legumi da fara siccara ppé l’invernu e poi
aiu e fara a conserva di pomadori. Comu a fazzu eu nun a fa nessunu,
pecchì eu ci aiu ‘nu segretu tuttu meu ppé avira a sarza frisca tuttu l’annu.
‘Na casa senza donna nun po’ jira avanti, nun esista. Certu, a fimmina ha
d’avira giudiziu; guai a spusara una e chiddi chi passanu u tempu a lisciarzi
i capiddi e a farsi bedda, pecchì allora nu povaru maritu affunda propriu comu
a barca du cumpara Bastianazzu, pacia all’anima sua!
Santuzza Beatu iddu! E’ mortu a vigilia da Madonna di Setta Dolori, ‘nu jornu santu!
Sugnu sicura ca iddu pregherà ppé nui, povari peccaturi ‘nzema all’angiali
e ai santi du Paradisu. “A chi vuol bene, Diu manda pene!” U cumpara
Bastianazzu era unu e chiddi chi si facia i fatti suoi, nun sparrava du
prossimu comu tanti atri.
Grazia Santuzza ci ha u mela a ra vucca!
Zoppidda Ppé forza, si no nun puterra fara l’ostessa, cumu si dicia, china nun ha arta,
chiuda a putica, china nun sa notara, annega.
Mangiacarrubbe Aiu sentutu dira ca mintanu puru a tassa subra u sala, me l’ha dittu u dottora
speziala. Dicia ch’era scrittu stampatu a ru giornala. A stu puntu. dicu eu,
nun potimu cchiù salara l’acciughi, né i sardi; a stu puntu cu i barchi ‘nde
potimu attizzara u focu.
14