Leggi pubblicazione on line - Arcipelago Adriatico

VII
CONCORSO MAILING
LIST HISTRIA
computer ga fato siopero e ghe digo: “Nona, vado
su, sul computer de sio, par scoltar la musica che me
piasi a mi.” Squasi subito drio de mi, ‘riva anca me
mama par parlar co’ nona, no so de quai problemi.
Un poco parché me piasi, un poco par no scoltarle,
go alsà el volume al masimo. No ve digo la reasion de
me nona! La ga scominsià a urlar come una danada:
“Sbasa quela schifesa! Te me rompi i timpani! Sera la
porta! Ciò, sturlo, cosa questa te la ciami musica? Go
l’impresion che el cuor me xe cascà in scarsela, tanto
che me bati drento el stomego. ‘Deso capiso parché
che se dir che sta musica fa STOMEGO!!! Sera duto!
Me par de star int’una fabrica co le machine che xe
diventade mate. Ven qua xò che te spiego mi cosa che
vol dir musica!” A sto ponto anca me mama me ciama
xò, parché la sa che co a me nona ghe ciapa i sinque e
la taca a sigar, no la finisi cusì presto.
Vado in cusina e vedo me nona che la sbisiga int’un
casetin. Po la lo sera e la ven visin de mi e la me disi:
“Ciapa qua, scolta ste do casete. Ma scoltele ben,
cusì te capirà cosa che vol dir musica.” Ma invese de
darmele in man, par paura che no le scolto, la meti
una int’el registrator. Par dir el vero quela xe l’unica
machineta che la sa far funsionar, ma me rendo conto
che no xe el momento che faso comenti del genere.
Me nona no parla più e anca me mama sta sita. Se
speta che ‘rivi la musica, par veder che “antiquariato”
che la ga tirà fora del casetin. Intanto el registrator
lasa vignir fora rumori de disturbo, che mi no son
più abituà a scoltar co le nove tecnologie. Parti la
musica. Xe un valser, e par mi xe xà grave. Me nona
estasiada la scolta. Me mama, credo che par rispeto,
la fa finta de scoltar. Mi no so come comportarme.
Stago sito e xà che son, visto che el ritmo xe una
lagna, me meto a scoltar le parole… “La me mama
povareta, la m’ha dà un fià de dota: ‘na pignata
duta rota e ‘na tola de lavar….”. Scominsiemo ben!
Drento de mi me domando: ma cosa, questa xe la
canson dei disgrasiai? Ma no digo gnente, tanto so
che ste cansoni no le xe mai masa longhe, e speto
fiducioso, ma no masa, la prosima. Gambia ritmo,
ma no gambia el contenuto: “La mia mama me ga
dito no sposar le mule more, le xe dute traditore, no
me sposarò mai più – resto celibe”. Me faso coragio
e speto che ‘rivi la tersa e me digo drento de mi, se
xe ancora una compagna, go paura che s’ciopo. E
puntuale la ‘riva: “El mio papà no lasa che sposo un
calafà. El mio papà no lasa che sposo un disperà.….”.
65
Ben, penso che più calmo de cusì no podevo star,
ma la pasiensa ga un limite e el mio limite xe xà
sorpasà, e ghe faso: “Nona, cosa te son andada in
qualche museo dei disgrasiai a trovar ste cansonete
cusì antiche e cusì disperade?” E go s’ciopà a rider,
un poco par rabia e un poco par disperasion. Dovevo
pur sfogarme, liberarme de quel che se me gaveva
ingrumà in corpo scoltando sti testi. Me mama me
varda e la me fa moti de star sito e serio, par no
pegiorar la situation. Ma me nona, che no xe sempia,
la se ga inacorto subito de ste ociade de intesa fra
mi e me mama e la sbora: “Ignorante el fio e tonca
la mare”. E par fortuna la se la ga ciapada con me
mama. “No te se ricordi, co xe vignuda sia de Trieste
e che la me ga portò ste casete con cansoni che una
volta se cantava qua de noi. No le xe miga dute tristi.
Ghe ne xe anca de alegre, ma par apresarle bisogna
conoserle e par conoserle ghe vol scoltarle più volte.
Mi co le sento me par de tornar picia. Vedo ‘torno
de mi tanti visi conosui, tante persone che no vedo
più de tanti ani. Xe quele persone che xe andade via
de Isola e che xe spaliade pal mondo, naturalmente
quele che xe ancora vive. Me ven inamente le feste
de sposalizio, i batisi, le feste religiose. Quando che
se iera duti insieme, quante ridate, quanta alegria
e quante cantade che se faseva. Ierimo duti una
granda famea e ste qua, e tante altre cansoni, serviva
a ligarne ancora de più, a farne sintin come che se
dir DUTI PAR UN E UN PAR DUTI. A cantar iera bravi
specialmente i omi che, dopo ver bivù un pèr de
biceri de quel bon, i ghe dava soto
fina che i gaveva vose. Noi pici, visin de lori,
cantavimo e ciuciavimo suchero brostolà, parché
caramele no ghe ne iera. A mi, questa musica me
ricorda le mie radise, i mii parenti, i mii amici, insoma,
la mia gente. A ste cansoni xe tacai i mii più bei
ricordi, quei che no dismentegarò fina che vivo.
Questa xe la musica dela nostra tera, cansoni che
no devi andar dismentegade parché le apatien ala
nostra cultura. Cansoni tramadade de pare in fio,
cansoni vece secoli e restade sempre vive.” E po’
vardandome mi: “E ti, fra un pèr de ani, cosa te se
ricordarà de sta tua musica? E co te sarà vecio, e te
sentirà un toco de quei che adeso te piasi tanto, che
emosioni te podarà gaver, visto che al giorno de ogi
le cansoni dura al masimo do ani? Sensa tignir conto
che de ciaro i testi xe in italian e ti no te sa gnanca
cosa che te canti.”