MOLUSKUEN LISERI-GURUINEKO EPITELIOAREN ... - Euskara

Zati Teorikoa
Timidina tritiatuaz markatutako arratoi helduetan, konduktuen zelula pikortsuak
konduktu ertaineko oinaldeko zeluletatik eratorriak direla behatu da. Hasiera batean,
konduktuen zelula pikortsu ildaxkatu bihurtzen dira (tarteko egoera), azkenean zelula
pikortsu helduak bilakatu arte (Chai et al., 1993; Denny et al., 1993). 3H-T markaketaindizeek
erakutsi dutenaren arabera, ez dirudi konduktu ertainetako zelula amek bizkor
zatitzen direnik. Haatik, jarduera proliferatzaile altuena zelula pikortsu ildaxkatuek erakutsi
dute. Hau da, zelula amak astiro zatitzen diren bitartean, zelula pikortsu ildaxkatuak, agian
TAC zelulen analogotzat har genitzakeenak, bizkor zatitzen dira, gerora guztiz
desberdintzatuak direnean zatiketa-tasa berriro ere motelduz doalarik (Chai et al., 1993).
Listu-guruinetan esperimentalki kalteren bat induzituz, azinoen kopuruan eta
tamainan murrizpena sortaraztekotan, (adb., apoptosia bultzatuz), konduktuen antzeko
egitura tubularren agerpena suertatu da (Takahashi et al., 2002). Dirudienez, egitura
tubular horiek konduktu ertainetatik eratorriak izango lirateke, eta azino-zelulen zelula
aitzindarien ordezko sortuberriez osatuta egongo lirateke (Takahashi et al., 1998; 2002).
Beste autore batzuen arabera, berriz, tubulu horiek zelula jariatzaileak galdu dituzten
azinoak baino ez lirateke izango, zelulen kopuru egokia berreskuratuz gero berriro ere
funtzionalak bilakatuko liratekeenak (Scott et al., 1999). Bistan denez, momentuz egitura
tubular horien jatorria eta esangura biologikoa ez daude batere argi.
Listu-guruinek, kirurgi-buxadura 5 egunez jasan ondoren, konduktuetako zelula
pikortsu helduek proliferazio-jarduera handia erakutsi dute, 3H-T zein PCNA markaketak
erabiliz frogatu dena (Takahashi et al., 2000). Aitzitik, listu-guruinen kirurgi-erauzketa
partziala egin ondoren, azinoen berreskurapena konduktu nagusietako zelulen proliferazio
eta desberdintzapenaren bitartez gauzatzen dela behatu da, ebakuntza eta gero geratzen
diren azinoek nolabait ere parte hartzen dutelarik (Hanks & Chaudhry, 1971).
28. Irudia: Listu-guruineko konduktu nagusia buxatuta duen arratoian burututako PCNA immunohistokimika.
Azino zein konduktuetako zelulek marka positiboa (geziak) erakutsi dute (Takahashi et al.-etik (2001) hartua).
50