MOLUSKUEN LISERI-GURUINEKO EPITELIOAREN ... - Euskara

Zati Teorikoa
horretan, III motako tubuluen proportzioa liseriketa prozesuan zehar konstante mantentzen
da, eta I eta II motako tubuluen artean txandakatzea suertatzen da itsasaldi-zikloan zehar
(McQuiston, 1969). Edozein modutan, tubulu guztietara elikagaia aldi berean, neurri
berean eta konposizio berarekin heltzen ez denez, liseri-guruinean 4 liseriketa-faseak
(tubulu-motak) bereiz daitezke aldi berean, proportzio oso desberdinetan bada ere
(McQuiston, 1969; Robinson & Langton, 1980; Robinson, 1983).
Lau tubulu-moten existentzian oinarrituz, liseriketa intrazelularra azaltzeko teoria
bat plazaratu zen (Morton, 1983; Henry, 1987; Beninger & Le Pennec, 1991). Elikagaiak
heldu bitartean, tubuluak atseden-fasean egongo ziren. Elikagaiak tubuluetara
iristerakoan, liseri-zelulek elikagaiak xurgatuko lituzkete (xurgatze-fasea), eta liseriketa
bukatzearekin batera zelula asko deuseztatuko ziren (desegite-fasea). Azkenik, hurrengo
liseriketa-zikloari ekin ahal izateko, epitelioa zelula berriez hornituko zen (berregite-fasea).
Teoria horren arabera, liseriketa-zikloa eta epitelioaren berriztapen-zikloa koordinaturik
egongo ziren (Morton, 1983), eta zelulen berriztapen masiboa ordu gutxitako epean
suertatu beharko zen. Hau da, liseri-epitelioan zelulen berriztapen-maila izugarri handia
izan beharko litzateke, eta liseri-tubuluetako epitelioa partzialki (liseriketa difasikoa) edo
guztiz (liseriketa monofasikoa) berriztatua izango litzateke elikatze-ziklo bakoitzeko,
etengabe. Aitzitik, epitelio-zelulen zatiketa ez da batere konspikuoa liseri-epitelioan
(Marigómez et al., 1998a).
7. Irudia: Liseriketa prozesuan zehar muskuiluen
liseri-epitelioak hartzen dituen morfologia desberdinak.
(A) Atseden-fasea, (B) Xurgatze-fasea, (C) Desegitefasea
(D) Berregite-fasea. (Langton-tik (1975)
birmoldatua).
12