Saskia Del Zotto_L'Italia - Lia Rumantscha

amitga, jeu vi era ir cun ella sil bein puril a luvrar!! Schei dar mei, jeu vi uss ir cun Gada,
Lai dar mei immediat, ti tuppa caura!!!”, sgregna Peppina e cauldas larmas dalla gretta e
dalla violenza cuoran ad ella dalla vesta giu. Ella dat culs pugns e culs peis suenter alla
dunna. Mo lu tucca enzatgei dir siu tgau – ella piarda la schientscha ed ei vegn tut ner
entuorn ella.
Peppina sa buca con temps ch’ella ha durmiu, mo ei sto esser ualti ditg – il sulegl va schon
da rendiu. “Nua sun jeu?”, leva Peppina dumadar la veglia, mo ella ei buca pli leu. Enstagl
ei uss in um sin la carrotscha. “Ah, è svegliata!”, cloma quel, mo tgei munta quei? In auter
um contempla ella da surengiu: “Sì, sì allora abbiamo ancora ca. mezz’ora finché arriviamo
a Venezia.” “Tgei lungatg tschintscheis vus insumma?”, vul Peppina saver dils dus. Mo
lezs miran mo crutsch sin ella e din: “Ma di dov’è quella bambina, non è sicuramente
italiana!”,,E mi hanno detto che lei è svizzera.” “Ah, una svizzera.” “Tgei vuleis vus da
mei? Jeu vi ir a casa.” A casa – cheu vegn tut puspei endamen ad ella, ch’ella ei ida naven
da casa cun ina carrotscha e ch’ella ha stuiu prender cumiau da Gada.
Gl’emprem ein els i encunter vest e lu engiu, also el sid. Aschia ei quei! Ella sesanfla
ell’Italia, tgei cletg ch’ella ha dau bein adatg en scola en geografia. “Capis vus dus lu
insumma buca romontsch gnanc in tec? Jeu vess numnadamein in pèr damondas.” “Che
cosa ha detto la bambina?” “Io ho capito qualcosa di capire romancio o qualcosa così!”
“Noi non capiamo il romancio cara mia.” Oje tgei ha el ussa puspei paterlau? Enzatgei da
‘no capire’. Aha els capeschan buca romontsch!
Miarda! Tgei fetschel jeu ussa pomai? Mo ei resta buca temps ad ella da sefar patratgs sur
dil lungatg e sia situaziun, perquei che gest en quei mument vesa ella in marcau ch’ei
nundetg bials, cun ina baselgia aschi biala e gigantica ch’ella ha aunc mai viu. “Allora
signorina, siamo arrivati a Venezia.” Mhm... Venezia, in bi num per in marcau, patratga
ella. Els carreschan cumadeivel atras il marcau vegl, cheu seferma la carrotscha. “Ecco ci
qua. Devi scendere adesso e andare in questa casa, bambina.” El muossa sin ina casa avon
siu nas. Aha mia plazza. Ella gi aunc spert adia als dus umens e va lu en direcziun
mussada. Ella splunta vid igl esch casa. Nuot. Ella splunta quella gada schi fetg che ses
mauns fan mal. Uss auda ella pass. La porta sesarva ed ina fumitgasa cumpara. Ella
contempla Peppina per in mument da sum tochen dem, lu gi ella: “Ah tu devi essere la
bambina svizzera.” E meina ella ell’emprema alzada. Co quei vesa ora nobel cheu, patratga
ella per sesezza. E lu pér il tschabergal tut ord bronz. Ella vegn strusch da serrar la bucca
dil surstar. “Qui è la tua cameretta”, di ella. Peppina va en e metta sia coffra sper il letg. La
combra ei ualti pintga ed ha en bunamein neginas mobiglias, mo quei ei gie buca schi
nausch, ina combra tut mo per ella, a casa ha ella stuiu parter la combra cun ses fargliuns.
“Vieni dopo giù che ti dico cosa devi ancora fare oggi”, gi la fumitgasa. “Oje mine. Tgei
ha ella ussa detg a mi?” In mument: “Enzatgei da vegnir giu fare. Ah, i giu a far enzatgei.
Peppina semetta sin via dad ir engiu, mo ella ha ditg, perquei ch’ella sto contemplar tut,
ella streha culla detta sur ina bellezia fatscha orda gep vi.
Puspei leugiu vegn la fumitgasa schon encunter ad ella. “Non toccare mai le cose qui in
casa capito!?” “Eh... gie capito.” “Allora qui ci hai i tuoi vestiti di lavoro.” Ella tegn
encunter a Peppina ina rassa che vesa ora sco sch’ella fuss schon vegnida purtada d’in pèr
persunas. Suenter ver tratg en quella rassa orda glin, vegn la fumitgasa, che hagi num
Francesca, e fa schubergiar ella la cuschina da sum tochen dem. Igl ei tard la sera cu
Peppina ha finalmein finiu la cuschina. Ella seschlueta anavos en sia combra. En letg vegn