Facts and Figures rumantsch - Lia Rumantscha

Enstagl d'in epilog
En las valladas renanas ha il «Tamagur» da Lansel in pendant en la poesia «Stai si defenda» (1887) dal
poet sursilvan Giachen Hasper Muoth (1844 – 1906). La poesia da Muoth ha la medema simbolica sco
quella da Lansel ed è sco quella in appel fervent al pievel rumantsch da defender sia lingua e cultura
(vesair G. Deplazes, Die Rätoromanen, 1991, 123 – 26):
Al pievel romontsch
Stai si, defenda,
Romontsch, tiu vegl lungatg,
Risguard pretenda
per tiu patratg!
Dedesta tut cun tun sonor
Dil frontsch romontsch cantau da cor!
Quel tuna ferm e suna clar
E cuora senza balbegiar,
Gie, cuora senza balbegiar,
Essend artaus dal best matern schi car.
Stai si, sedosta,
Romontsch, pil plaid grischun,
Lai buc a posta
Satrar tiu dun!
Tiu cor, tiu spért ein umbrivai
Dal vierv romontsch e vegnan mai
A concepir in auter senn,
A parturir in niev talent,
Gie mai midar il scaffiment:
Romontsch ei tia sort, tiu truament.
Stai si e mira,
Romontsch, tgei avantatg,
Midond natira,
Tes frars han fatg!
Il vierv matern vegn emblidaus,
Il plaid tudestg ei scumbigliaus;
Biars plaidan mender ch'ils affons,
Schizun Tudestgs da treitschien onns.
Gier, tudestgai da treitschien onns
Han aunc adina plaids romontschs danvonz.
Stai si e senta,
Romontsch, el cor sincer
La vana stenta,
Va buc en err!
Ils schiembers creschan spels glatschers
E seccan vi, plantai els ers.
Ed il romontsch, lungatg alpin,
Naschius el clar dil matutin,
Carschius el clar dil matutin,
Ruina tiu talent cun sia fin.
Stai si, Giadina,
Stai si, ti Sut- e Sursilvan,
Tetgn car adina
Tiu plaid roman!
La mumma plonscha, audas ti?
Vilenta quella buca pli!
Mo fai siu plaid sincer udir,
Che cuschentava tiu bargir,
Quei plaid migeivel clar sentir,
Che vos dus cors e spérts san entelgir.
(La Poesia de G. C. Muoth, ediziun festiva, 1945)
Entant che l'emprima strofa è in appel als Rumantschs da defender la lingua e l'ierta culturala, pretenda
la segunda anc pli energicamain da sa dustar per il pled rumantsch e da betg laschar sartar ses
dun. Il cor e la raschun èn animads dal sun rumantsch e na vegnan mai a pudair schendrar autras
valurs culturalas. La terza strofa fa attent a quels ch'han gia midà la lingua e pers qua tras lur vaira
natira, lur identitad. Il resultat è ina maschaida da linguas, udibla anc suenter plirs tschientaners.
L'ultima strofa appellescha a tut ils Rumantschs d'amar lur lingua, da restar fidaivels al vierv matern
che collia il cor e la raschun.
103