Is Pregadorias antigas: su signo de sa devozioni - Provincia del ...

Comune di Furtei
Pregadoria po sa noti 122
A Deus mi racumandu,
a sa gloriosa Vírgini Maria,
a Santu Giuanni Batista,
a is Cuatru Evangelistas
e a totus is Santus de su Celu
chi bengant a mi donai
Comunioni, Peniténtzia e Ollusantu
in nòmini de su Babbu, de su Fillu
e de s’Ispíridu Santu.
Pregadoria serrendi s’enna 123
Serru s’enna de domu mia
cun su mantu de Maria,
cun s’ispada de Santu Simoni,
sa domu mia est de perda de cantoni.
A chi circat sa domu mia
mai potzat agatai ne sa porta ne sa bia.
S’Immaculada Cuncetzioni 124
Canta Lourdes venturosa
Cun suavi melodia
Salve, o Vírgini Maria,
De is celus abbasciada!
1) Cali istella matutina
Totu pura e luminosa
In sa gruta prus famosa
Ti cuntemplat Bernardina
De sa gràtzia tua divina
Dulci istait e ammirada. Rit.
2) At inténdiu Bernardina
Una boxi dulci e bella
Domandendi una capella
Po sa genti pellegrina
Po chi fessit arreina
De is visitas onorada. Rit.
3) De s’edadi in primu frori
S’est cumparta sa visioni,
Su bistiri e sa personi
Donat grandu risplendori
E nd’iscadenat s’amori
Sa dulcíssima sua mirada. Rit.
4) Bistiri biancu e velu,
Cintu asulu risplendenti
Cun rosàriu prus luxenti
Est calada de su celu
Po salvai cun grandu zelu
Si c’est genti arribbellada. Rit.
5) “Ita sentis, afligida,
O dulcíssima Signora,
Ita bolis in cust’ora?”
Dha domandat sa pipia.
“Peneténtzia, filla mia!”
Dha rispundit angustiada. Rit.
6) Dha domandat chi sa rosa
Infioresit po signali,
E po cura materiali
Bogat àcua prodigiosa
Ch’est mexina portentosa
Po sa genti tribbuliada. Rit.
7) Giai cun tanti zelu scípia,
Bolis sciri chini sia,
Cun sa própria buca mia
Su nòmini miu t’isvelu:
Mi nomenant in su celu
Cuncetzioni Immaculada. Rit.
8) Monti oscuru fortunau,
O citadi aventurosa
Cun su pei suu sa gloriosa
Sa terra tua at tocau,
Lucíferu at isvelau
Ca de totus est amada. Rit.
89