Is Pregadorias antigas: su signo de sa devozioni - Provincia del ...

Comune di Furtei
Pregadoria 109
Candu sa campana sonat po su péspuru
A péspuru in Celu
a péspuru in terra
dogn’ànima segura, segura
at a èssi de dogna pena
dogna ànima batiada
de pecau siat iscolta e perdonada.
Pregadoria 110
De acuasanta mi segnu
a Deus saludu in primu
e a Nostra Signora
no apu ascurtau Missa ancora
cun d-unu frori de allirghia
e cun d-unu frori de argentu
Siat sempri saludau
su Santíssimu Sacramentu.
Pregadoria 111
Gesugristedhu candu fut nàscidu
bellu mi pariat, bellu mi pareiais
unu cereu portaiais
unu cereu in manu tenendu
e unu líbburu ligendu
un’ànima salva e santa
beneditu siat Deus e sa Mama sua Santa.
Pregadoria a Sant’Anna 112
Benedita siast o Sant’Anna
e s’ora chi seis nàscia
Sant’Anna, Sant’Anna mia
seis sa Mama de Maria
in sa corti celestiali
seis sa Mama nosta manna
cun s’isposu tuu Giuachinu
a su témpiu eis presentau
sendi ancora pitia
a filla bosta Maria,
sa Mama de Gesús
castiaimí sempri prus cun amori
campaimí de s’eternu dabori
Gesús s’est nebodi
de su mundu est su Redentori,
fadei po mei e po totus
siat de s’ànima su Salvadori.
Pregadoria a Sant’Antoni Abbate 113
(po agatai is cosas pédrias)
87
Sant’Antoni de su fogu
candu fiais eremita
alluiais trexi fogus
po chi custa persona (sa chi at agatau sa
cosa pédria e non dha bolit torrai)
mai tèngiat riposu
ne pesada ne crocada
ne in domu ne in bia
ponedhi iscinitzu de fogu
bàsciu chi non mi torrat
sa prenda mia (si narat sa cosa chi
s’est pédria).
Pregadoria apustis comunigaus 114
Benibeniu su Signori,
benibeniu e apariciau,
chi m’at iscarésciu calincunu pecau
cun bosu Signori dèu dhu cunfessu
ca at a èssi prontu a mi dhu perdonai
prus chi no dèu a dhu cunfessai;
cuntenta est s’ànima mia
de su pani chi at papau
ciuetu e impastau
de su lati de piturra de Maria,
cuntenta est s’ànima mia.