Is Pregadorias antigas: su signo de sa devozioni - Provincia del ...

Comune di Furtei
Nostra Signora de Lourdes 90
Dimostrendi tantu amori,
A su mundu ses benia,
De Lourdes, Virgo Maria,
Consola su pecadori!
1) Che fulgidíssima istella
Ses cumparsa luminosa
In besti càndida ermosa
a s’úmili pastorella,
sorridenti e tantu bella,
cun celesti risplendori! Rit.
2) De Massabielle in s’artura
cumparta est custa reina
a s’ingénua Bernardina,
tantu innocenti e pura:
“Beni e non tengas paura!”
dhi narat cun tantu amori. Rit.
3) Bernardina in cuss’istanti
si mostrat meda turbada
si ponit ingenugada
cun su coru palpitanti;
ammirat… pregat intanti…
cun ispeciali fervori! Rit.
4) Estàtica est abbarrada
s’innocenti Bernardina
cuntemplendi sa reina
de is celus abbasciada
e totu meravigliada
ndi cuntemplat su candori! Rit.
5) Custa Dama magestosa
a Bernardina narada:
“Dèu seu s’Immaculada
Vírgini, tantu amorosa:
non ti mostris dubbiosa
non tengas tanti timori!”. Rit.
6) S’Immaculada reina
Promitit felicidadi
cun ogus de piedadi
a sa bona Bernardina
no in sa vida mischina
ma cun su summu Fatori! Rit.
7) Si mostrat addolorada
cussa Mama de bundadi
po totu s’impiedadi
de su mundu addimostrada,
est de celu abbasciada
po benni in nostu favori! Rit.
8) Issa, in tali cuntingéntzia,
racumandat cun rigori
a su tristu pecadori
peniténtzia… peniténtzia…
po gosai s’indulgéntzia
de Deus nostru Sennori! Rit.
9) Salutari una sorgenti
de cussa roca induria
in prova est iscaturia
cun prodígiu sorprendenti
e Bernardina presenti
osservat cun istupori! Rit.
10) In su logu fortunau
cussa celesti reina,
domandat a Bernardina
chi dhi siat fabbricau
unu templu e dedicau
a Issa cun santu onori! Rit.
11) Bernardina at rivelau
A su mundu totu interu
cun coru giustu e sinceru,
cantu at bistu e ascurtau,
cantu dh’at racumandau
tali Mama cun amori! Rit.
12) A Lourdes nosi portaus
cun s’ispíritu anelanti;
in sa fonti ristoranti
is malis nostrus curaus
inní remédiu incontraus
a sa pena e a su dolori! Rit.
83