Is Pregadorias antigas: su signo de sa devozioni - Provincia del ...

Comune di Furtei
Is seti doloris de Maria 87
1) Po fillu miu ispirau
a manus de su rigori
Seti ispadas de dolori
su coru m’ant trapassau. Rit.
2) Truncau portu su coru,
su petus portu freciau
debustis chi nd’at pigau
su ricu miu tesoru,
cun tanti pena ignoru
cumenti m’est ammancau. Rit.
3) O vida mia acabbada
in sa mellus picinnia,
mòrriri dèu credia
cun tegus crucifissada
cun sa própriu lantzada
mi feresit su costau. Rit.
4) Giudeus po s’amori ‘e Deus
in custa fatali dí
puru a mei inclavaimí
acanta a fillu miu,
su corpus bocit s’ebreu,
s’ànima non at tocau. Rit.
5) Seti crudelis feridas
seti frécias penetrantis
donant morti bastantis
a innumeràbbilis vidas,
donaimidhas totu unias
in custu coru liagau. Rit.
6) Cumpliu eis giai s’ecessu
de dhu biri prestu defuntu;
poita totu in d-unu puntu
non boceis a mei e a issu?
De bivi m’eis cuncessu
ma Addolorada m’eis lassau. Rit.
7) Giai chi est mortu fillu miu
puru prestu acabbaimí
e morra dèu in custa dí,
e cun cudhu fillu de Deus
crudeli e duru giudeu
oh cantu ses ostinau! Rit.
8) Morti non mi lessist bia,
morti non tardis prus,
ca essendi mortu Gesús
non podit bivi Maria;
unu fillu chi tenia
sa vida ndi dhi ant pigau. Rit.
9) O Babbu eternu abasciai
de is altas istantzas divinas
e tirai cudhas cortinas
meda tristas cantu mai,
aici eis a cuntemplai
a fillu bostu pretziau. Rit.
10) Benei, àngelus, benei
cun is càlixis in sa manu
de su sànguni soberanu
in turrentis arregolei,
suspirai e prangei
custu Gesús lastimau. Rit.
11) Poita chi tirannia
su giudeu at usau?
Su dolori totu est su miu,
sa pena totu est sa mia,
totu, totu est po Maria
su dolori cunservau. Rit.
12) Non de parti ‘e su rigori
po nisciuna creatura
totu est mia s’amargura,
totu est miu su dolori,
cussu mortu Redentori
est fillu miu istimau. Rit.
13) A mei tocat su dolori
poita su mortu est su miu,
fintza essendi pipiu
ndi apu tentu disconsolu
ca su coru miu solu
custa morti at penetrau. Rit.
81