Is Pregadorias antigas: su signo de sa devozioni - Provincia del ...

Comune di Villanovafranca
Dèu mi crocu 923
Dèu mi crocu po mi dromí
tres cosas apu a pedí:
cunfessioni, cummenioni e Ollusantu.
Babbu, Fillu e Ispíridu Santu.
Dèu mi crocu po mi dromí 924
Dèu mi crocu po mi dromí,
s’àngellu bengat a mi bistí,
siat a peis siat a conca.
Nostra Sinniora siat pronta
a mi nai “Maria, riposa”,
nostra Sinniora mia gloriosa.
Dèu mi fatzu sa cruxi 925
Dèu mi fatzu sa cruxi in su fronti,
candu Gesugristu fiat in su monti.
Dèu mi fatzu sa cruxi in sa buca,
candu Gesugristu fiat in sa gruta.
Dèu mi fatzu sa cruxi in su costau,
candu Gesugristu fiat incravau.
Dèu mi fatzu sa cruxi in su petu,
candu Gesugristu fiat in su desertu.
In nomi de su Babbu, de Maria mamma,
is doxi apòstulus, is cuatru evangelistas.
Deu mi nc’intru in sa sepoltura 926
Dèu mi nc’intru in sa sepoltura,
chi mi ndi pesi non seu sigura.
Dèu mi dromu e non isciu aundi andu,
Misericórdia de coru domandu:
Cunfessioni, cummenioni e Ollusantu.
Babbu, Fillu e Ispíridu Santu.
Deus Ti salvit, Reina 927
Deus Ti salvit, Reina,
chi seis Mama piedosa e
dulci e fragranti rosa de Paradisu.
Tui ses alligria e risu
de dogna isconsolada
e de dogna tribulliada.
Tui ses su respiru,
dèu pràngiu e sospiru
in custu campu de pena,
Tui faci de Serena
si fuit sa paura,
Maria Madre de dultzura
is ogus tuus piedosus
eternus e amurosus
furriainosí, arregollinosí
bàsciu su Santu sógliu
e Fillu Tuu in su Celu
fainosí biri,
fai chi potzaus fuiri
de dogna ocasioni
e de vera tentatzioni de pecai
po dha pòdiri acabbai bèni
sa vida nostra
e cun sa manu Bosta
lompat a su celu,
Mama de Santu zelu,
mama sa prodigiosa
dulci mama amorosa
Deus Ti salvit.
Dromi vida e coru 928
Dromi vida e coru e riposa anninnia.
Dromi vida e coru dhi narat Maria.
Is pastoris passant
cun totu is brobeis
a basai is peis
de su Redentori
E su pecadori patit agonia.
Dromi vida e coru, riposa anninnia.
633