Is Pregadorias antigas: su signo de sa devozioni - Provincia del ...

Comune di Villamar
Pregadoria 859
De su Celu pigu pani, o Sacramentu,
siat sempri allabau su Santíssimu
Sacramentu.
Pregadoria 860
Dèu mi crocu po mi dromí
tres cosas si bollu pedí
Cunfessioni, Comunioni e Ollusantu.
In nòmini de su Babbu, de su Fillu
e de s’Ispíritu Santu.
Pregadoria 861
Ninna nanna cantu est s’òru
sa mantíglia fiat de òru
su bistiri de brocau
Gesugrisu fiat crocau
nudu nudu e iscobertu
sa gruxi fiat po letu
sa corona po cabidabi
su binti cíncui de Nadali
fiat nàsciu Sarbadori
gei nd’iat de lugori
in su partu de Maria
dromi vida e coru
arriposa anninnia.
Pregadoria 862
De is pecaus mi nd’ispollu
e de terra mi crobexu
s’ànima mia a Deus ofrexu
e a sa Vírgini Maria,
ispirit in paxi cun Bosu
custa pòbera ànima mia.
Amen Gesús.
Pregadoria 863
Pillonedhu pitiu pitiu
mi seu pesada in bonu caminu
in su bonu caminu mi seu pesada
ogus a Celu apu castiau
ogus a sa Groriosa
Mama frisca che s’arrosa
Mama frisca che su lillu
bonanoti Babbu e Fillu.
Pregadoria 864
In su letu miu mi nc’intru
s’àngelu beneditu, s’àngelu cantendi
Nostru Signori est predichendi
sa luna est cun su soli
biadu Santu Sarbadori
biadu Santu Giuanni
s’aremigu
non m’ingannit
ne a dedí ne a denoti
po finas a s’ora de sa morti
po finas a s’ora de su fini
s’àngelu Serafinu
s’àngelu annuntzianti
cun s’Ispíritu Santu
cun Bosu ispirit
su coru e s’ànima mia.
Pregadoria 865
Seu andada a bingixedha mia
seu passada in sa bia romana
domandau apu a chi dhoi est passada.
Dhoi est passada Nostra Signora
Santu Giusepi fut de cumpangia
tzípiri e murta e cambu de obia.
603