Is Pregadorias antigas: su signo de sa devozioni - Provincia del ...

582
IS PREGADORIAS ANTIGAS - SU SIGNU DE SA DEVOTZIONI
Tertza dí
Tertzu dolori e tertza allirghia de Santu Giusepi
Pagu non iat dépiu sunfriri sa teneresa bosta, o dignu isposu de sa Santíssima Vírgini
mamma de Deus, candu estis bistu su bambinu divinu assugetau a sa sanguinosa
circuncisioni s’otava dí de sa nàscita sua: ma cumpentzada fiat istétia súbbitu custa
pena cun su cuntentu de pònniri a issu su nòmini gloriosu de Gesús, chi signíficat
Salvadori, poita depiat salvai su pópulu suu, e libberaidhu de su pecau.
Deh! Po cudhu dolori e po cudh’allerghia alcantzainosí de bíviri mortificaus in
su corpus nostu e de consighiri totu is efetus de cudhu nòmini adoràbbili e potentíssimu,
est a isciri sa libberatzioni de is pecaus nostus e su gosu de s’eterna
saludi. Aici siat.
Si cantat seti Babbunostus, seti Ave Maria e seti Gloria Patri.
Oratzioni a Santu Giusepi
O amàbbili Santu Giusepi chi po s’ecellenti virginidadi bosta meritestis de èssiri
isposu de sa grandu mamma de Deus, nosi figuraus chi Gesús fillu bostu putativu
in s’ora de sa morti bosta at a ai nau coment’e Isacu a su fillu Giacobbe: Odorosa
est s’ànima tua cali campu plenu de lillus. Ma paràulas aici suavis ant a èssiri
nadas a nosàterus ancora, candu a nosi giudicai at a bènniri su Fillu de s’ómini, a
nosàterus chi non seus campu floriu, ma terra bruta e fetenti? Deh! Tenei piedadi
de nosàterus míserus serbidoris bostus e alcantzainosí, chi custa corrúmpia e fetenti
terra cun sa propítzia virtudi de s’Ispíridu Santu cambit is malus umoris, e
de suavis àcuas fecundada, cominzit a prodúsiri lillus de puresa. Oteneinosí ancora
chi a difesa de is nous floris de virtudi, pongat una serradura sa prus forti a
su coru nostu po ndi cunservai s’integridadi e s’odori, po chi a sa fini de sa vida
nosta, plenus de cunfiantza bengat Gesús diletu nostu, bengat comenti a logu de
delítzias in su coru nostu. Aici siat.
Cuarta dí
Cuartu dolori e cuarta allirghia de Santu Giusepi
Bosi cumpadesseus, o dulcíssimu isposu de Maria, po s’aflitzioni chi trapassau bos
iat su coru, insaras candu in sa purificatzioni de issa estis inténdiu de sa profética
buca de Simeoni chi su divinu bambinu Gesús iat a èssiri istétiu su bersàgliu de is
contradditzionis de is óminis, chi un’ispada de dolori iat a trapassai s’ànima de sa
tènera Mamma sua. Ma puru nos allirgaus de su gosu bostu in su biri comenti cudhu
Santu profeta intrau in edadi, e sa profetessa Anna riconosciat is grandesas de su
celesti bambinu e dh’annuntzianta narendu chi sa glória siat issu de Israeli, e de su
mundu su Salvadori. Deh! Po cudhu dolori po cudh’allerghia, oteneinosí de èssiri in
su númeru de cudhus, chi po is méritus de Gesugristu e po intercessioni de sa Vírgini
Maria, sa sorti ant a tènniri una dí de resuscitai a sa glória inesprimíbbili de su celu.
Aici siat.
Si cantat seti Babbunostus, seti Ave Maria e seti Gloria Patri.