Is Pregadorias antigas: su signo de sa devozioni - Provincia del ...

Comune di Villacidro (Bidhaxidru)
is próprius parentis suus segundu s’umana relatzioni de sànguini dhi fiant contràrius.
Aici issu at permítiu po nosi fai cumprèndiri, chi non bisòngiat contai asuba de su
mundu, ne fidai in s’amicítzia de is óminis, ma de circai su [in?] Deus solamenti totu sa
felitzidadi nostra. Est beru chi issu amat sa Mamma sua, ma dh’amat po s’eminenti
santidadi chi possidiat. Santu Giuanni benit nomenau po ecelléntzia su prediletu discípulu,
ma apuntu po sa virginidadi chi iat cunservau sèmpiri… si su coru miu aduncas
est atacau a s’amori de is creaturas dèu seu dignu de cumpassioni, e de làgrimas; mentras
dèu no apu a pòdiri otènniri mai de is personas de su mundu su chi no at pótziu
otènniri Gesús. De imoi innantis aduncas su coru miu no at a dèpiri circai si no a Gesús,
e in cussu ogetu divinu firmai totu sa fortza de is disígius suus e bosu soberana bellesa,
bondadi infinita, eis a èssiri s’únicu e solu ogetu capatzi de afetzionai su coru miu.
Nona e última dí
Amantíssimu Gesús miu, su Coru bostu est unu coru totu bonu e misericordiosu.
Mancai dèu sia su pecadori su prus mannu, nienti de mancu su Coru bostu est tantu
téneru e apassionau po mei chi est totu efetu de sa bondadi de issu si illuminau de sa
fortza de sa gràtzia sua, mi seu finalmenti indúsiu a connòsciri e a cunfessai su caminu
totu malítzia in su cali fia bivendi, e oi comenti isperu m’incontru àtera borta
ocupau de su serbítziu suu!
Oh! benedita cudha dí in sa cali mi seu lassau incontrai e incadenai de is finesas de su
Coru bostu divinu, caru Gesús miu.
Ma comenti custu Coru adoràbbili at pótziu sighiri a suspirai e interessaisí po unu coru
miseràbbili, chi aici mali at corrispostu a tanti bondadi, ne a is displexeris chi dh’ant
causau is ingratitúdinis mias, no at contrapostu àteru si no una inalteràbbili passiéntzia?
Cunfessu chi in totu su mundu non s’incontrant pecaus, coment’e is pecaus mius; comenti
non s’incontrant displexeri uguali a cudhu chi bos apu donau candu apu pérdiu sa gràtzia.
O coru divinu, bosu mi rinfaciais is infidelidadis mias, e nienti de mancu bosu seis
s’única isperantza mia: dèu domandu perdonu e po dh’otènniri non tengu abbisóngiu
si no de bosu. Sa misericórdia bosta mi ànimat a dhu isperai, arreceimí, o Gesús, in su
Coru bostu sagrau, est iní chi dèu bollu fissai s’abbitatzioni mia, plangendu is disórdinis
de totu sa vida mia, e pighendu coràgiu e fortza po castigai e assugetai is passionis
mias, impegnendumí a connòsciri sèmpiri prus s’ódiu chi depu tènniri a su pecau.
No, Signori, dèu no apu a èssiri prus un’ingratu; sighei bosu a mi cunfortai cun sa
gràtzia bosta: in custu modu dèu comenti propongu mi apu a mantènniri sèmpiri fideli
a bosu, e bosu eis a tènniri in mei una concuista de su divinu Coru bostu. Aici siat.
Meditatzioni
Mortificatzioni de su Coru de Gesús.
Considera, ànima mia, chi Gesús at portau tali amori a sa mortificatzioni, chi de su
nascimentu suu fintzas a sa morti mai s’iat permítiu cosa, chi potzessit losingai su
corpus suu: de ricu chi fiat si est fatu pòberu, a is onoris at preferiu is umiliatzionis, a is
alabantzas is disprétzius, una corona de ispinas a unu diadema; a unu sóliu sa gruxi:
donendunosí a intèndiri cun custas atzionis suas, chi po passai in su caminu giustu de su
575