Is Pregadorias antigas: su signo de sa devozioni - Provincia del ...

Comune di Villacidro (Bidhaxidru)
sprétzius, e issu mai respondiat a is ofesas, e a is insultus. Meda tempus inantis de sa
nàscita sua su Profeta Isaias annuntziendidhu a su mundu narat de Gesugristu, chi
issu no iat a èssiri de umori tristu, ne inchietosu, e chi mai s’iat a intèndiri artzai sa
boxi. Ma comenti imitat su coru miu su Coru tantu amàbbili de Gesús? Comenti
sunfru dèu, e cumpadessu is vítzius e is difetus de su próssimu miu? Is disprétzius, e
is ingratitúdinis chi mi sunti fatas. Ah! De cantu fintzas a imoi est suzédiu in mei
s’esperiéntzia mi dimostrat chi mi seu lassau dominai de sa supérbia, e de s’inchietúdini…
Gesús est unu Deus de paxi chi no istabbilessit su regnu de s’amori suu si no
in is corus chi professant, e sighint s’amabbilidadi sua. E dèu etotu, o Gesús miu, seu
un’ogetu singulari de sa dultzura de su Coru bostu. Cantus bortas apu meritau po is
pecaus mius chi mi fessit serrau su Coru bostu divinu? Epuru dogna borta chi apu
implorau sa misericórdia bosta non solamenti m’eis apertu su Coru, ma m’eis circau
ancoras, e tzerriau cun ispiratzionis, po mesu de is calis eis circau de m’incadenai a
bosu. Comenti dèu potzu aduncas fai connòsciri a bosu s’amori miu, si non portendumí
cun su próssimu comenti bosu bosi portais cun mei? Dignaiosí, Gesús miu, de
versai in su coru miu cun s’untzioni de sa gràtzia bosta sa suavidadi, e s’amabbilidadi
de is sentimentus bostus. Aici siat.
Sétima dí
O Coru sagrau de Gesús, bosu po èssiri uniu ipostaticamenti a su verbu eternu meritais
adoratzionis infinitas. Tesoru perenni de dogna bèni, printzípiu de totus is virtudis,
tronu de caridadi increada bosu meritais alabantzas sentza númeru. Vítima digna
de sa giustítzia, e sola capatzi a soddisfai po is pecaus nostrus, bosu meritais de nosu
un’amori infinitu, si de tali amori féssimus capatzis: ma unu tzertu amori assumancu
bos ofereus sentza divisioni, sentza términu, e sentza riserva, e nosi protestaus chi
dogna cosa chi eus a amai dh’eus a amai in bosu, po bosu, e cantu boleis bosu. Si, a
bosu, o Coru divinu de Gesús, est dépiu totu s’amori nostru. Epuru cantu pagus sunti
cudhus chi bolint riconnòsciri su legítimu impériu bostu! Cantu pagus sunti cudhus
chi provint, isperimentint e gustint sa suavidadi, e sa dultzura de sa sugetzioni bosta!
Potzessi dèu sotomítiri e incadenai is corus de totus is óminis a su Coru bostu scratíssimu!
Ti amu Gesús miu! Potzessi fai cumprèndiri a totus cantu est necessàrius de
s’inserrai in d-unu Coru tantu amàbbili, e libberali! Potzessi assumancu cun is ossécujus
mius, cun su dolori, cun is làgrimas, antzis cun su sànguini miu reparai is ofesas
chi dhi faint s’indiferéntzia, e su disprétziu de is chi non dh’amant.
O coru divinu de Gesús si est necessàriu chi su coru miu suspirit ancora, po meda
tempus in custa terra de làgrimas, e de esíliu, dèu apu a collocai sa consolatzioni mia
in su pensai sèmpiri a bosu, e aici incantau in su Coru bostu, apu a fai fervorosamenti
in custa terra a onori e glória bosta su chi disígiu ardentementi de fai cantu prus
prestu in su Celu. Aici siat.
Meditatzioni
Umilidadi de su sagrau Coru de Gesús. Considera, ànima mia, chi Gesús in sa terra
fiat in d-unu continu esercítziu de sa prus prufunda umilidadi. Considera comenti in
573