Is Pregadorias antigas: su signo de sa devozioni - Provincia del ...

Comune di Villacidro (Bidhaxidru)
Segunda dí
Coru amàbbili, e adoràbbili de Gesús Salvadori miu, ecu a mei prostrau ananti de
bosu po si domandai perdonu de tantas ofesas, chi eis de mei arreciu fintzas de sa
pipiesa mia, e chi dogna dí arriceis de tantas ànimas insensíbbilis a is misericórdias
bostas. Bosu seis totu amori po nosàterus, e nosàterus seus po bosu totu ingratitúdini
e isconoscéntzia. S’amori bos at fatu vítima nostra, e in is corus nostrus nisciuna
ricumpensa incontrat cuss’amori bostu tantu apassionau. Bosu in su Sacramentu seis
atzéndiu de is próprias flammas de amori, chi bos iant consumau in su Calvàriu, e
nosu is prus bortas non corrispondeus a tanti amori, si no cun irreveréntzia, ofesas e
sacrilégius.
Su Coru bostu est sèmpiri apertu po ispàrgiri asuba de nosàterus benefítzius e
gràtzias, e dimostrendu cumpassioni po is malis chi nos afligint boleis bosu su refúgiu
s’agiudu, sa consolatzioni nostra: ma nosu nos allargaus de bosu, e circaus foras
de su Coru bostu unu consoladori a is malis, e aflitzionis nostras, e surdus non boleus
ascurtai is internus, vivus e tènerus cumbidus chi fadeis a is corus nostrus po si amai.
O Coru Divinu de Gesús, cantu depeis èssiri afligiu de su disprétziu de su scarescimentu,
de sa duresa nostra.
Amori de Gesús tantu oféndiu nosi cunfessaus culpaus a sa preséntzia bosta. E aici
comenti prus che totu bos incontrais oféndiu in s’augustíssimu Sacramentu de s’amori
bostu, de imoi inantis eus a usai aparíciu e fervori po dh’arreciri dignamenti: eus a
usai modéstia e arregolimentu in is crésias, e dh’eus a visitai cun cantu prus frecuéntzia
eus a pòdiri, insumma nienti eus a lassai po si dimostrai in custu Sacramentu sa
gratitúdini, sa riconoscéntzia, e sa giusta ricumpensa de s’amori chi bosi depeus.
Custa est sa risolutzioni nostra, custu su propósitu nostru, o Coru amantíssimu de
Gesús. Siais però bosu sa fortza nostra po cumpliri fidelis cantu proponeus e disigiaus:
prestu sa morti inantis de nosi biri àtera borta infidelis a is promissas chi fadeus
a su Coru bostu totu amori. Aici siat.
Meditatzioni
Zelu de su Coru de Gesús po sa glória de Deus.
Considera, ànima mia, chi nisciunu coru at disigiau mai cosa cun tantu ardori, cantu
su Coru de Gesús at disigiau de glorificai s’Eternu Babbu suu, procurendu de dhu fai
connòsciri, adorai, serbiri e amai de su mundu totu interu. Custa glória fiat s’ogetu de
is movimentus suus, e su motivu de is operatzionis suas: e si iscarésciu de sèi etotu
cun premura celestiali iat donau cumplimentu a su sagrifítziu de sa gruxi; si ispasimanti
de amori órdinat su Sacramentu de s’amori suu po bivirisindi cun is óminis
fintzas a su fini de is séculus, totu òperat po sa glória de su Babbu su Coru de Gesús…
Ma cali est su zelu chi ànimat is corus nostrus po sa glória de Deus? Est su coru
nostru unu coru chi ímitit su Coru de Gesús? E dh’ímitit dimostrendusí generosu
puru, disinteressau coment’e su Coru suu? Nosàterus feus biri de circai sa glória de
Deus, e fintzas in is pràticas de piedadi, e divotzioni pensaus a tot’àteru che a sa
glória de Deus, cuntentus de cumpàrriri bonus e giustus mancai realmenti non siaus.
Cun frecuéntzia nosi lassaus dominai de su rispetu de su mundu, e po sa paura de
567