Is Pregadorias antigas: su signo de sa devozioni - Provincia del ...

Comune di Villacidro (Bidhaxidru)
Oratzioni a Maria Immaculada
Puríssima Vírgini Maria! Immoi cumprendu su chi indicai bolliat s’Arcàngelu Gabrieli
insaras candu annuntziendu s’Incarnatzioni de su Verbu Eternu, chi cumpliri si
depiat in su sinu Bostu, bos iat nau, chi Bosu estis incontrau sa gràtzia a sa preséntzia
de Deus. Si, dh’intendu. Bosu incontrestis gradimentu summu a sa preséntzia de
Deus, poita estis incontrau su pretziosu tesoru de sa gràtzia Sua, e inní apuntu aundi
is àterus fillus de Adamu dh’ant sèmpiri pérdiu. Ah! In su primu instanti de sa vida
dognunu de is óminis, perdit sa gràtzia de su Creadori suu, e in cussu puntu po sa
culpa originali abbandonau benit in sa massa de sa perditzioni, fatu fillu de ira, ne de
àteru prus merescidori che de ódiu e de cundennatzioni eterna. Ma Bosu, o Maria,
Bosu non timeis de sa parti de Deus, ne ódiu, ne ira, poita eis incontrau in cussu
instanti sa gràtzia sua. Benaventurada Maria! E tantu prus fortunada in cantu chi non
po Bosu sola estis incontrau acetatzioni, e gràtzia, ma ancoras po nosàterus pecadoris,
e tanti nd’estis incontrau, chi su bellu títulu estis merésciu de printzipali Abbogada
nostra pustis de Gesugristu. Bosu duncas cun su frutu Beneditu de is intragnas
Bostas eis a placai sa giusta ira de Deus contra de nosàterus, eis a stèndiri sa benéfica
manu Bosta, po sustènniri is passus nostrus in su periliosu camminu de custa vida. E
po conseguéntzia o potenti abbogada nostra, nosàterus bosi invocaus in is presentis
abbisòngius nostrus, e in is abbisòngius estremus de sa morti nostra, credendu firmamenti,
chi si benigna nosi mirais nos eis a fai súbbitu provai abbundantis is misericórdias
de su Fillu Bostu Gesugristu, poita seis clementi, e piedosa, o dulcíssima, o
benedita Abbogada, e Mamma nostra Vírgini Maria.
Un Pater, tre Ave, un Gloria.
Última dí
Sa soberana puresa de Maria in sa Immaculada Cuncetzioni Sua mancai prodigiosa,
e sentza esemplu, non cumparit però a su mundu tantu noa, chi de su mundu non si
depessit aspetai. Deus, Signori de is tempus, e de is cosas, chi finas de s’eternidadi
s’iat elígiu a Maria in Filla primogénita, in Mamma e in Isposa, e chi de Issa si
cumplaxiat in modu inefàbbili ainantis ancora chi fessit esistia, iat bófiu in dogna
tempus annuntziaidha a is óminis cun profetzias, cun misteriosas immàginis e cun
figuras. Sa grandu fémina, chi scerfai depiat sa conca de su Serpenti in su Paradisu
terrestri promítia de su própriu Deus, sa fémmina singulari, chi totu Vírgini, e pura iat
a cuntzebiri unu Fillu ammiràbbili, prenuntziada de su profeta Isaias: un’Ester sola
libberada de su decretu de morti fatu contra su pópulu Ebreu, una Giudita, chi sola cun
su cumunu tirannu cumbatit, e bincit, de prus s’ària chi segura si nd’istat asubra de is
àcuas de s’universali Dilúviu, in su cali vítima aturat dogna àtera cosa: su velu de
Gedeoni, o asciutu in mesu a unu campu bagnau, o bagnau in mesu a unu campu asciutu;
s’arca de su testamentu totu formada de linnas incorrutíbbilis; cudhu monti asubra
de totus is àterus montis; cudha creatura, po agiudai sa cali iat èssiri bénniu Deus ainantis
de su tempus: su lillu bellu in mesu a is ispinas: s’ortu serrau, su fonti sigillau, totu
custus e àterus, sunti signalis, is calis de Maria, e de sa singulari puresa sua, de Issa
finas de su primu instanti possidida, fuedhant a is óminis in is séculus antigus. Ma
563