Is Pregadorias antigas: su signo de sa devozioni - Provincia del ...

554
IS PREGADORIAS ANTIGAS - SU SIGNU DE SA DEVOTZIONI
Oratzioni a Deus Santificadori
Eternu Ispíritu Santificadori! Sentza de Bosu nienti s’incontrat in s’ómini de bèni,
nienti de innotzenti, e po conseguéntzia sa naturalesa umana sentza sa virtudi bosta
Divina, est andada giai de meda tempus corrumpendusí sèmpiri prus, e infamementi
degradendusí etotu. Ma ecu chi Bosu torrais e custa naturalesa de bell’e nou animais
in Maria, o florèssiri dha fadeis totu noa, e de innantis prus bella.
Gràtzias duncas infinitas bosi donaus o Eternu Divinu Ispíritu; tzertamenti a Bosu
cumbeniat de possidiri interamenti cudha fémina sa cali intre is puras creaturas depiat
èssiri sa prus privilegiada, e sa prus bella. A bosu, chi in is camminus prus ocultus
penetrais, e chi ispirais, e candu boleis, sentza chi nisciunu iscípiat de aundi beneis,
e aundi andais, si a bosu, repitu, aparteniat ocupai is primus camminus de Maria,
po chi non lassendu arribbai finas a issa àlidu pestíferu de Inferru, estis tentu
líbberu campu de dh’arrichiri, e dh’adornai cun prodigalidadi casi infinita. Ancoras
nosàterus seus istétius in su batismu arrichius e santificaus de bosu, mancai no in
modu tantu etzellenti coment’e Maria. Ma oh dolori! Nosàterus bos eus bèni prestu
contristau cun is gravíssimas culpas nostras. Ita duncas bos eus a nai? Umiliaus e
cunfúndius bosi dimandaus misericórdia. Dignaiosí o Piedosu Divinu Ispíritu de
torrai un’àtera borta de Maria in nosàterus e imprimendu in is corus nostrus unu
caràteri de vera Santidadi, siais sèmpiri su primu motori diretori, e ghia, de dogna
sentimentu, e atzioni nostra.
Un pater, tre Ave, un Gloria.
Oratzioni a Maria Immaculada
Puríssima Vírgini Maria! Dèu adoru s’Ispíritu santificadori chi totu bosi possidit in
su primu instanti de sa vida bosta pretziosa. Adoru sa plenitúdini de is gràtzias, chi
finas de cussu momentu issu depósitat in su sinu Bostu, e adoru ancoras is operatzionis
inefàbbilis de custu Ispíritu asubra de Bosu, chi totu de issu possidida, ne cuntzebiu
estis mai unu pentzamentu si no puríssimu, ne tentu estis inclinatzioni, o afetu, si
no ordinadíssimu, ne mai estis donau in totu sa vida bosta una mirada, ne unu passu,
unu movimentu solu, su cali santu non fessit, e digníssimu de sa infinita santidadi de
Deus. Ah! Bosu seis veramenti plena de gràtzia: veramenti seis bosu s’única benedita
intre totus is fémminas: veramenti cun bosu est finas de printzípiu in modu singulari
su Signori. Ma deh! Regordaiosí, o bella Maria, chi no po Bosu solamenti arriciu
estis de s’Ispíritu Santificadori tanta plenitúdini de gràtzia, no po Bosu sola, ma po
ndi dispensai ancoras a is infelitzis fillus de Adamu, a cudhus ispetzialmenti, is calis
si glóriant de èssiri in modu singulari divotus bostus!
Un Pater, tre Ave, un Gloria.
Cuarta dí
Maria creada, riscatada, santificada in modu totu singulari, e inefàbbili, mancai non
cumpàrgiat in su mundu si no coranta séculus pustis sa creatzioni de su primu Babbu
nostru Adamu, est nienti de mancu sa Filla primogénita intre totus is puras creaturas