Is Pregadorias antigas: su signo de sa devozioni - Provincia del ...

Comune di Villacidro (Bidhaxidru)
Sétima dí
Deus e Signori de su Coru de is Tronus in is calis reposais coment’e in su Tronu de sa
maestadi bosta, dèu bos ofèrgiu is méritus de custus altíssimus Ispíritus, e in modu
particulari is méritus de s’Arcàngelu bostu Santu Rafieli su cuali pustis de is trabballus,
e mortificatzionis sunfridas in cudhu viàgiu tantu perigulosu, intrapréndiu po
acumpangiai a Tobbias, dh’iat collocau in su reposu de sa famíglia gosendu cun grandu
consolatzioni totus is bènis chi dh’iat fatu consighiri: dèu bosi pregu chi mi
cuntzedais sa paxi de su coru, non permitendi mai, chi dèu dha perda esponendumí a
su pecau, o a su perígulu de arrui in disgràtzia bosta: bosi pregu chi mi cuntzedais una
teneresa particulari in totus is pràticas de piedadi, e de divotzioni chi apu a esertzitai,
sentza pèrdiri de vista sa memória de sa dultzíssima preséntzia bosta, po mi animai
sempri prus a serbirisí cun totu amori, e fidelidadi e mi cuntzedais impari s’impegnu
de mi collocai in is bratzus de s’altíssima providéntzia bosta, seguru e prus che tzertu
chi essendu in bratzus bostus, bratzus de veru amori, m’eis a dispensai sèmpiri is
gràtzias chi mi sunt necessàrias po sa salvatzioni de s’ànima mia.
Otava dí
Deus e Signori de is Cherubbinus, is calis s’incontrant dotaus de una sapiéntzia perfetíssima,
dèu bos ofèrgiu is méritus de custus Ispíritus sapientíssimus, e in modu particulari
is méritus de s’Arcàngelu bostu Santu Rafieli su cuali cun d-una maravigliosa
sapiéntzia si fiat donau a connòsciri manifestendi s’ecellentíssima naturalesa sua a su
babbu, e a su fillu Tobbias de is calis iat pigau sa custódia, e sa protetzioni, donendidhis
notítzia de is soberanus secretus e maravíglias de Deus, e lassendidhus prus che imparaus
in su conoscimentu de dogna cosa chi potzat serbiri a s’ómini po si acostai prus e
prus a su caminu de sa salvatzioni. Dèu bosi pregu chi po mesu de sa sapiéntzia de custu
Santu Arcàngelu illumineis s’intendimentu miu po chi dèu otenga sa verdadera sciéntzia
sa cali consistit in su sciri connòsciri, amai, e serbiri a bosu chi seis s’únicu ogetu
chi potzat lassai cuntentus e apagau is disígius de su coru, giai chi po custu nos eis
formau, Deus miu, po nosi santificai in vida, e po nosi coronai de glória in s’eternidadi.
Última dí
Deus e signori de is Serafinus, is calis bosi amant cun d-un’amori ardentíssimu, dèu
bos ofèrgiu is méritus de custus teneríssimus Ispíritus, e in modu particulari is méritus
de s’Arcàngelu bostu Santu Rafieli, su cuali cun su fogu de s’ardentíssima caridadi
sua, iat lassau infervoraus e plenus de grandu amori is corus de totu intera sa
famíglia de su Santu béciu Tobbias, dhus iat lassaus plenus de fervori po serbiri a sa
Soberana Maestadi bosta cun verdaderu, e costanti aggradissimentu po is favoris, e is
gràtzias chi iant arreciu de sa manu bosta divina. Dèu bosi súplicu chi avaloreis, cun
su divinu amori bostu, sa voluntadi mia, e infervoreis su coru miu cun d-unu costanti
aggradessimentu, e riconoscéntzia a is benefícius bostus e una perseveràntzia continua
in su caminu de sa virtudi, po pòdiri bínciri dogna ostàculu chi mi potzat fai
pèrdiri sa santa amicítzia bosta, in sa cali tengu sperantza de mi conservai fintzas a
s’últimu respiru de sa vida mia.
549