Is Pregadorias antigas: su signo de sa devozioni - Provincia del ...

548
IS PREGADORIAS ANTIGAS - SU SIGNU DE SA DEVOTZIONI
Cuarta dí
Deus e Signori de is podestadis, is calis tenint poderi ispetziali de rafrenai is nemigus
infernalis, dèu bos ofèrgiu is méritus de s’Arcàngelu bostu santu Rafieli, a su cali iais
cuntzédiu poderi singulari po chi in su desertu de s’Egitu superiori ponessit in cadenas
cudhu dimóniu nomenau Asmodeu in custu modu is óminis de is terríbbilis insídias
suas e donendidhis fortza, e virtudi de bínciri sempri chi dhu bolessint is malignas
sugestionis suas. Dèu bosi súplicu chi mi cuntzedais sa gràtzia e sa virtudi de sa
santa puresa, una modéstia particulari in su fuedhai e in s’operai, una delicadesa
esemplari in dógnia atzioni, po mesu de sa cali cunservi sempri regulaus is sentidus
mius, a talis chi custu nemigu crudeli nienti potzat incontrai in su portamentu miu chi
serbat de motivu a promòviri e etzitai custas tentatzionis infernalis, e aici cunservai
sempri firma e costanti s’amicítzia bosta divina.
Cuinta dí
Deus e signori de is virtudis, po mesu de is calis operais miràculus, e prodígius próprius
de su poderi bostu soberanu, dèu bos ofèrgiu is méritus de custus Ispíritus prodigiosus
e in modu particulari is méritus de s’Arcàngelu bostu Santu Rafieli, po mesu de su cali
sa manu bosta poderosa iat operau su miràculu de torrai sa vista a su béciu Tobbias, de
libberai de su pisci su fillu, de difèndiri a Sara de is calúnnias de sa serbidora, e de dhis
donai felitzidadi in su matrimóniu cun fortunada e numerosa sucessioni. Dèu bosi súplicu,
chi po mesu de custu santu Arcàngelu esertziteis in s’ànima mia is prodígius de mi
donai luxi, e sapiéntzia po connòsciri, costàntzia e firmesa po sighiri su caminu de sa
piedadi, de sa divotzioni e de sa virtudi, passiéntzia e rassignatzioni po sunfriri cun
coràgiu is ingiúrias is calúnnias e is imposturas, chi mi ant a èssiri fatas, e cunfiàntzia
po nd’isperai su remédiu, arregordendu sèmpiri, chi sa gruxi est su caminu seguru de su
Celu, e chi dognunu depit portai sa gruxi sua cun amori, e passiéntzia, po pòdiri consighiri
sa benaventurantza eterna. Aici siat.
Sesta dí
Deus e Signori de is dominatzionis is calis presidint totus is Ispíritus, ministrus inferioris
de sa Providéntzia bosta e chi sunt sugetus a sa voluntadi bosta po dha pònniri
in pràtica e esecuzioni. Dèu bos ofèrgiu is méritus de custus Ispíritus tantu ecellentis,
e in modu particulari is méritus de s’Arcàngelu bostu Santu Rafieli su cuali mancai
fessit unu de cudhus Ispíritus supremus e superioris si fiat umiliau a prestai serbítziu
a su giòvanu Tobbias donendidhi assisténtzia duranti su cursu de su viàgiu, serbendidhi
de guida, de custódia, e de agiudu, e restituendidhu a domu sua pustis de dh’ai
imparau a osservai perfeta ubbidiéntzia a su babbu giai béciu, e pustis de dh’ai fatu
connòsciri sa manera, cun sa cali si depiat guvernai po pòdiri cunservai sa paxi e sa
cuncórdia cun s’isposa, e cun totu intera sa famíglia sua. Dèu bosi súplicu chi mi
cuntzedais una pronta e perfeta ubbidiéntzia a totus is magioris e superioris mius,
fadendu sagrifítziu de sa voluntadi mia po cumpliri dogna cosa chi mi at a èssiri
imposta e ordinada e in custu modu isperimentai cun totu evidéntzia e seguresa chi
s’ubbidiéntzia est sa grandu virtudi chi fait is Santus.