Is Pregadorias antigas: su signo de sa devozioni - Provincia del ...

Comune di Siddi (Sidhi)
De puresa sovrumana,
Ses àngelu in forma umana
Mandau de su Signori.
Danieli màrtiri...
Una boxi de s’altura
Ti nat a fui su mundu,
Dh’ascurtas totu giocundu
E circas sa clausura
Aundi tenis prus sigura
Sa gemma de su candori.
Danieli...
T’abbratzas sa poberesa
De s’órdini franciscanu
E cun gosu sovrumanu
Bivis in mesu a s’aspresa,
Cun flagellus sa salvesa
Dimandas a su Signori.
Danieli...
In Céuta movis gherra
A s’errori, a su pecau,
Bolendi bí in cussa terra
Su veru Deus venerau,
Ma de is morus suscitau
Ndi bis s’ódiu e su furori.
Danieli...
Ti maltratant aspramenti
Cun is ses cumpàngius tus
Osservendi chi a Gesús
Cunverti bollis sa genti,
Ma cun zelu prus ardenti
Prédicas in su dolori.
Danieli…
Cust’eróica firmesa
In sa fidi cristiana
Prus atzendit sa fieresa
De sa turba maometana
Chi ti donat inumana
Nou stràtziu cun furori.
Danieli…
S’ímpia turba infuriada
Ti trascinat in presoni
Sa cristiana religioni
Bolendi bí detestada,
Ma no chi mancu s’ispada
T’at a incútiri terrori.
Danieli…
In cussu logu de penas
Arbàliu, giugi crudeli,
T’osservat, o Danieli,
Iscioltu de is cadenas
Chi passas oras amenas
Alabendi su Signori.
Danieli…
Su rei ímpiu mussulmanu
Ti tentat cun is promissas
Isperendu infami cun issas
De ti rendi maometanu,
Ma tentat sèmpiri invanu
E disprétzias dogna onori.
Danieli…
De otènniri is intentus
Tenendi ancora sperantza,
Po ndi abbati sa costanza
Ti donas nous turmentus,
Ripitis ch’is patimentus
Po Deus sufris cun amori.
Danieli…
Ma mentras costanti e forti
disprétzias penas e dolori
Un’ispada cun furori
Ti donat bàrbara morti,
Aici otenis sa sorti
De morri po su Signori.
Danieli…
De su celesti riposu
Aundi Gosas cun Gesús
Protegi is divotus tuus,
Danieli miracolosu.
449