Is Pregadorias antigas: su signo de sa devozioni - Provincia del ...

Comune di Siddi (Sidhi)
A Santa Luxia 635
Ses sa luxi meda ermosa
Ch’illuminais is mortalis,
Dona rimédiu a is malis,
Luxia santa gloriosa.
Siracusa de Sicília
Est sa pàtria tua diciosa,
Aundi nascis, bella rosa
De illustríssima famíglia
Cristiana giusta e sintzilla
Caritativa e piedosa.
Dona rimédiu...
De bellesa singulari
T’at dotau su Signori,
E, po un’ecessu de amori
E donu particulari,
De gràtzias casi unu mari
T’at fatu e prodigiosa.
Dona rimédiu...
De sa prus pitica edadi
A Gesús cun puru amori
As sacrificau su flori
Lillu de virginidadi
Cun afetu e caridadi
Allirga e meda gustosa.
Dona rimédiu...
Po èssi vera imitadora
De s’isposu tuu sagrau
A is pòberus as donau
Bènis e prendas ancora
Sentza èssiri tui signora
De sa prus mínima cosa.
Dona rimédiu...
Custu spollu volontàriu
Ti at móviu gherra forti
E apressadu sa morti
A istàntzia de s’aversàriu
Chi si creiat, temeràriu,
De tenni a tui po isposa.
Dona rimédiu...
De Pascàsiu presidenti
Ses istétia cundennada
A èssi luegu portada
A domu de infami genti,
Ma Deus ti fait potenti,
Immóbbili e poderosa.
Dona rimédiu...
De fogu ardenti ingiriada
Ti bis, e tui, portentosa,
Cantas allirgas e gososa
E de issu non ses tocada;
Ti trapassant un’ispada
In su tzugu furiosa.
Dona rimédiu...
Aici etotu trapassada
Arricis s’eucarestia
E predixis s’allegria
e sa paxi suspirada.
Luegu ses ispirada
Felitzi e meda gustosa.
Dona rimédiu...
Ses colunna meda forti
De sa fidi e de puresa
Chi non at pótziu sa fieresa
De instrumentus ne sa morti
Faidí cambiai sa sorti,
O santa vitoriosa.
Dona rimédiu...
Ispetziali protetora
De sa vista corporali,
Prega a Deus po su mali
Chi cun is ogus ancora
Si cummitit a dognora,
E distruit dogna cosa.
Dona rimédiu...
- Ora pro nobis, beata Lucia
- Ut digni
Oremus 636
439