Is Pregadorias antigas: su signo de sa devozioni - Provincia del ...

436
A Sant’Elias profeta 632
Astru claru e luminosu
de s’ispíritu ferventi,
Donasí s’amori ardenti,
Elias miracolosu.
Sendu tzurpus is mortalis
Po sa vana idolatria
Cun su dimóniu po ghia
In is vítzius prus brutalis,
Po rimédiu a tantis malis
Tui comparis animosu.
Donasí....
Profeta de su Signori
in s’iscritura aclamau,
As su vítziu disterrau
Cun singulari fervori
Movendu su pecadori
A unu plantu dolorosu.
Donasí....
T’acumpàngiant is portentus
Cun magníficu isplendori;
Comenti a su Creadori
Ti obbidint is elementus:
Àcua, terra, fogu e bentus
Cun ossécuju rispetosu.
Donasí....
A sa fiuda afligida
Chi tenit su fillu mortu
E ti pregat cun trasportu
Chi si dhu torris in vida
Sa gràtzia fais cumplida
Cun miràculu famosu.
Donasí....
IS PREGADORIAS ANTIGAS - SU SIGNU DE SA DEVOTZIONI
SIDDI (SIDHI)
Cun coràgiu leoninu
A is ídolus fais gherra,
Restat sentz’àcua sa terra
Prus de tres annus continu,
Pregas a su Deus Trinu
Chi mudat s’afannu in gosu.
Donasí....
Cuatruxentus cincuanta
Profetas de impiedadi
Cun astútzia e falsidadi
Cussu pópulu ingannanta;
De Deus po sa lei santa
Elias solu est zelosu.
Donasí....
Dhis narat issu severu:
Duas vítimas prepareus
Pustis su fogu invocheus
Totus cun coru sinceru
Cudhu at a èssi su veru Deus
Chi s’ascurtat premurosu.
Donasí....
Cussus profetas preghendi
Si cantzant inutilmenti;
Elias trancuillamenti
Dhis fait befas narendi:
Tzerriai, chi viagendi
Sunt is deus o in riposu.
Donasí...
Apenas as invocau
A Deus chi cun premura,
Unu fogu de s’altura
Sa vítima at consumau;
S’idolatra est abbarrau
Aturdiu e bregungiosu.
Donasí...