Is Pregadorias antigas: su signo de sa devozioni - Provincia del ...

Comune di Sanluri
Regina de totus Profetas distintus,
meravigliosa in sa profetzia,
prima ’e dha bí nàscia fiant cunvintus
dh’íanta predísiu dolu e allegria,
candu a Zacaria at avisitau
su Verbu Incarnau portàt in su sinu,
cantat su divinu cànticu pacífica
s’innu su Magnificat po dh’abbiadai.
De dogna Apóstolu Regina est Maria,
fundadoris nous de Religioni
Perdu, Giuanni, Giàcomu, Bàrnaba e Andria,
de Maria ant tentu sa protetzioni
Giuda cun Simoni Giacu e Bartumeu
cun Filipu creu Tomasu e Matia
po biri a Maria de tesu bolaus,
de nou separaus po Evangelizai.
Regina de is Màrtiris e de Cristu Rei,
Gesús chi est mortu po su pecadori
su martíriu ‘e totus at sunfriu in sèi:
est po cussu mamma e mari de dolori,
de su Redentori nosu seus redímius
po no èssi oprímius de cudhu pecau
Gesús at pigau morti in su Calvàriu,
Maria santuàriu de totu su penai.
Regina ‘e firmesa de is Cunfessoris
s’única bellesa de su Sacerdótziu,
a Maria saludant totu is oradoris,
a pregai invitant s’umanu consórtziu
a chini s’est pótziu rivolgi a Maria
prima ’e s’agonia cun cunfessioni
diventat angioni de lupu rapaci,
de Cristu seguaci po si umiliai.
Regina de is Vírginis Maria figuras
sendu de puresa primu campioni,
bintu ant su mundu is ànimas puras
de Maria imitendu sa perfetzioni,
su Divinu Angioni puru immaculau
morendu at lassau po sa cumpangia
de tenni Maria po Fillu adotivu
su vírgini vivu Giuanni de amai.
Regina de is Santus de dogna istadu
e de dogna angélica e alta Gerarchia,
dogna Veneràbbili e dogna Biadu
depit èssi istétiu divotu a Maria
cun summ’allegria fait festa su celu,
altr’onori bellu dhis donat sa genti,
sa crésia biventi in nòmini ‘e Gesusu
dhis aprovat s’usu po dhus coronai.
369
Regina est Maria pura Immaculada
sentz’e culpa Originali Cuncebida,
sa columba eleta de Sionne bolada,
sa Verga de Iesse bella fiorida
de glória bistida cun mantu e diadema,
Regina Suprema po s’umanidadi,
a sa Trinidadi sa prus chi acisat
a nosu precisat a dha suplicai.
Regina est Maria Assunta in su Celu
po èssi coronada de sa Trinidadi,
Pio dodicésimu totu amori e zelu
aprovat su Dogma cun solennidadi
a unanimidadi in s’annu cincuanta,
totus aclamanta sa decisioni,
po s’Assuntzioni su festegiamentu,
su mundu cuntentu sighiat aturai.
Regina de su Santíssimu Rosàriu
chi a Santu Domínigu prenda rigalada,
in sa gherra ‘e Lèpantu fiat necessària
de s’èssi Maria puru interessada,
mellus de s’ispada po santu Domigu
contra su nemigu terrenu e infernali
arma triunfali po regnus e impérius,
cuíndixi mistérius po cummemorai.
A Maria nareus Regina de Paxi
in s’últimu títulu de is Litanias
depeus custa Mamma Celesti cumpraxi
cun is allabantzas e cun melodias,
giustas poesias a Issa e a Gesús
non podendu prus migliori onori,
cun paxi e amori cunfortat sa genti
prus chi umana menti dhu podit pentzai.